MBSE Chairman-in pass-te a lawmpui; Exam vuakvetah hripui vei 5 hmu chhuak

Mizoram Board of School Education (MBSE) chairman JH Zoremthanga chuan nimin khan thuchah a tichhuak a, High School Leaving Certificate Examination 2021-a pass-te a lawmpui thu a sawi a; exam lai leh answer paper endik laiin Covid-19 vei zirlai pathum leh zirtirtu pahnih hmuh chhuah a ni tih a tarlang.

JH Zoremthanga chuan, ruahman lâwk anga result puan a ni chu an lawm thu sawiin, "Pathian awmpuina vang liau liau a ni. Ruahman anga result kan puan theih chhan hi zirtirtute inpekna leh ṭhahnemngaihna vang a ni a, Covid-19 léng karah theihtawp chhuahin question setting, evaluation, scrutinizing, tabulation-ahte an tih tur felfai takin an hlen chhuak a ni," a ti.

Kumina MBSE-in exam a buatsaihah, HSLC-ah zirlai pahnih leh HSSLC-ah zirlai pakhatin Covid-19 an vei thu tarlangin Zoremthanga chuan, "Anni hi hriat chhuah an nih veleh exam tihtawptir a ni," a ti a; chu'ng zirlaite chu compartmental exam rualin exam chhunzawmtir an nih dawn thu a sawi.

JH Zoremthanga chuan, a huhoa answer paper endiktu zirtirtu zinga mi pahnih chu Covid-19 positive an ni tih hriat chhuah a nih thu tarlangin, "Mi dang an kai darh lohna turin a huhoa endikna (centralised evaluation) chu tihtawp a ni a, paper-te in lamah an hâwn a, hun ruat chhungin mark an rawn thehlut leh vek a ni," a ti.

MBSE Chairman chuan, inkaihhruaina zâwm chungin mahni inah pass lawm tum turin zirlaite a ngen a; Mizoram sorkar, SEC, zirtirtu, MISSTA, HISSLAM, MISA, School Education Directorate, DEO, SDEO, MBSE staff leh Examination branch-te chungah a lawmthu a sawi bawk.

MBSE Chairman tarlan
1. HSLC-ah syllabus 30%-a tihtlem a ni.
2. Zawhna har tihtlem a ni a, zawhna awl tihtam a ni.
3. MBSE-in model question a siam a, MISSTA leh MISA-in question bank an siam.
4. Kar khat zel atan ruahmanna siam a ni a, Youtube leh DDK leh a theih chinah online class neih a ni.
5. Kum 2021-22 atan HSLC leh HSSLC-ah week wise plan siam a ni tawh.
6. A theih chin chinah online class kalpui tum a ni.
7. HSLC & HSSLC zirlaibute district tinah a thleng kim tawh a, lei theihin a awm.
8. HSLC zirlaite Youtube, DDK leh hmanraw dang hmanga pek chhuah tum a ni.
9. CBSE, ICSE leh state board dangte'n exam an neih theih loh laiin Mizoramah exam a ni.
10. CBSE, ICSE leh state board dangte'n internal mark, quarterly test, pre-board exam, online assignment mark aṭangin HSLC leh HSSLC mark an siam dawn a, 100% deuh thawin an pass a rinawm.