Sample random test chhunzawm phût

ZPM party chuan thuchhuah siamin, Mizoram sorkarin swab sample random test a tihtawp chhan MLA Dr ZR Thiamsanga, Medical Operational Team on Covid-19 chairman-in a sawi chu an pawm theih loh thu an tarlang a, random test chhunzawm leh turin sorkar an phût.

Sample random test tihtawp chhan zawhna chu Dr ZR Thiamsanga'n, 'Kan hmu ṭeuh ang a, a enkawlna tur kan nei dawn si lo a, a buaithlak dawn lutuk a ni," tia a chhan thu sawiin ZPM chuan, "Sorkarin hripui a hmachhawn dan hi mak kan ti a, kan pawm thei lo. Random test hi chhunzawm leh turin sorkar kan phût a ni," an ti.

ZPM party chuan, Mizoramah hripui vei hmuh chhuah tam ber ní a indawt zut tih sawiin, "Chutih laia enkawl dan ngaihtuah peih loh vanga a tlâk tlâk vanduai tih ngawt mai hi khua leh tuite chunga mawh phurh peih loh vangah ZPM chuan kan ngai," an ti a; thi leh dam kara léng mipui bihrûksan lo turin sorkar an ngen.

Hripui inkài darh tur vênna ṭangkai bera ram dangte'n an ngaih chu a veite hmuh chhuah ran a, dah hran a, enkawl dam a ni tih sawiin ZPM chuan, "Chhungkaw tam takin sorkar tibuai kher loin mahnia inenkawlna remchang an nei. A zawn chhuah hna sorkarin a titawp hi a vanduaithlak a, inenkawlna nei zo lo chhungkaw harsate tan a rapthlak tak zet. Random test hi hri leng chhutchahna hmanraw ṭangkai páwl bera ngaih a ni," an ti.

ZPM party chuan, hripui donaah theihtawpa sorkar ṭawiawm an tum thu an puang chàmchí tih sawiin, "Lungrual taka hripui do a nih theih nan joint party meeting emaw, joint legislature party meeting emaw, special session hial emaw tal ko turin vawi tam tak thuràwn a lo pe tawh," an ti a; mahse, an ngennate tun thlenga tihpuitlin a ni lo chu sorkarin eptu party-te thawhpui ṭul a tih loh vang nia a lan thu an sawi bawk.