Ṭanpuina leh chhawmdawlna pe

Mizoram Pradesh Congress Committee Covid-19 Monitoring Committee chuan nimin khan lirthei khalha eizawng pawl pathum - Mizoram Taxi Association, City Bus Driver & Conductor Welfare leh Aizawl Two-wheeler Taxi Association hnenah ṭanpuina Rs. 20,000 ṭheuh an hlân.

YMA, Taitesena group (Serhmun West, Bunghmun West, Kawrtethawveng, Tuidam, Kawrthah, Réngdil, Zamuang, Hriphaw, Chuhvêl, Saikhawthlir, Nâlzáwl leh Dárlâk)-te chuan nimin khan Chhinga Veng mipui tan chawhmeh chi 50, pick-up phur li an pe. Chhinga Veng LTF chuan an lawm tak zet thu leh chawhmeh an dawnte chu an venga chhungkaw hrang hrangah an sem dawn thu an tarlang.

Maubuang VTF pawhin an khaw mipuiin an thawh khawm chawhmeh chi hrang hrang 32 chu June 2 zan khan Maubawk veng mipui tan Maubawk LTF hnenah an hlân a; Maubawk LTF-te chuan Maubuang khawtlang chungah lawmthu an sawi a ni.