Thusawi sawifiah turin HME Director phût

Mizoram Pradesh Youth Congress Committee (MPYCC) chuan, Hospital & Medical Education (HME) director Dr T Lalhmangaihi chu June 2, 2021-a Lungleia a thu sawi chungchang sawifiah turin an phût.

MPYCC chuan, MLA Zodintluanga Ralte-in chhim lamin an mamawhzia hriaa RTPCR kháwl a pek dan chu a dik tâwk lo, tiin HME director Dr T Lalhmangaihi'n a sawi thu an tarlang a, "HME Director-in, 'Mâwlmang taka khawl hi inpek chi a ni lo. Khâwl petu khâwl pek dan hi awmze nei lo, pressure cooker inpek ang deuh a ni' tia hnehsawh taka MLA thilpek ropui tak a sawisel hi hriatthiam har kan ti a, he thil hi Zoram mipui hmaa sawifiah vat turin kan phût a ni," an ti.

Zodintluanga Ralte hian June 13, 2020-a Lunglei DC, SP, CMO leh Civil Hospital Medical Superintendent-te nen an inkawm khawmnaa a tiam angin, June 26, 2020-ah RTPCR khawl a pe a, Lunglei DC leh District Task Force hnenah a hlân a ni.

Congress ṭhalaite chuan, Mizoram sorkarin a duh chuan thil hmanhmawh thlakah sum hman tur a pawt khawm rum rum mai tur a ni tih chu an ngaihdan a nih thu an sawi a, "PAHOSS-a sum dah, raw ṭiak supply-na tur sumte party invulh nana sum tam tak a dahte hi pawt péng nghal turin kan phût a ni," an ti.

October 15, 2020-a Mizoram Cancer Institute tana MLA C Ngunlianchunga'n ambulance a pek, tun thlenga registration tih a la ni lo chu an dem thu an tarlang bawk.