Zirlai pawlin pass-te an lawmpui

Mizorama zirlai pawlte chuan thuchhuah siamin, MBSE-in HSLC Examination 2021 result nimina felfai taka an tichhuak chu lawmawm an tih thu leh zirlai hlawhtlingte an lawmpui thu an tarlang.

MZP chuan, HSLC result tichhuak tura thawktute thawhrimna lawmawm an tih thu an sawi a; ram leilung fa zirlai pakhatna a ni chu lawmawm an tih thu sawiin, "Top ten-a tling Mizo zirlaite kan chhuangin kan lawmpui tak zet a, la hlawhtling ve rih lote pawh beidawng mai loa rilru thar pú a, a lehpekah chuan hlawhtling ngei tura bei turin kan ngen a ni," an ti.

Mizo Students' Union (MSU) chuan, HSLC 2021-ah pass percentage 82.43 a ni chu lawmawm an tih thu an sawi a, "Hlawhtlinna chang zawng zawngte ram leh hnam tana chhenfâkawm ni tura hlawhtlinna chang zel turin duhsakna kan hlan a ni," tiin, hlawhtlinna chang zo lote chu hnual loa hma lam pan turin duhsakna an hlan. Sorkar sikul aia private leh deficit school-te'n result an nei ṭha zawk chu sorkar tan inenfiahna tham nia an hriat thu an sawi bawk.

Students’ Self-Support Union (SSU) chuan, MBSE-in hripui leng kara HSLC result an tichhuak chu lawmawm an tih thu tarlangin, "Zirlai pass-te kan lawmpui rualin, hlawhtlinna chang lote kan tawrhpui tak zet a ni," an ti. HSLC top ten-ah Mizo vek an lang chu lawmawm an tih thu leh kum dang zawng aia result a ṭha chu lawmawm an tih thu an tarlang.

Congress party-a zirlai pawl National Student Union of India, Mizoram chuan, "Zirlai pass zawng zawng kan lawmpui a, pass zo lote kan tawrhpui a, beidawng loa ṭhahnemngaia bei nawn turin kan ngen a ni," an ti a; zirlaite chu an thiamna leh finnate ram leh hnam tan ṭangkai taka hmang turin an chah.