Mizorama Oil India hun pawhsei a ni
Mizorama tuialhthei (oil) leh gas zawn hna thawktu company zinga pakhat, Oil India Ltd. chu February 2022 thleng an license pawhsei a ni a, Oil & Natural Gas Corporation (ONGC) erawh chanchin hriat a la ni lo.
Vanglaini palai zawhna chhángin Geology & Mineral Resources (GMR) department hotute chuan, Covid-19 lêng avanga hna an thawh mumal theih loh avangin sorkar laipuiin Oil India-te license a pawhsei thu an sawi a, "Pandemic avangin time compensation atan sorkar laipuiin a pawhseisak a, hemi atan hian exploration license fee tur Rs. 95,00,000 pawh an rawn thehlut tawh," an ti. ONGC erawh chu an awm dan tur an la hriat theih loh thu leh bawhzui thuai an tum thu an sawi.
Tarlan tawh angin, Mizorama oil leh gas zawngtu ONGC leh Oil India-te chuan oil leh gas hralh tham Mizoramah an la hmu chhuak lo a ni. ONGC hian Mizoramah kum 2003 aṭangin oil leh gas zawn hna an thawk a, sq.km. 2,660 vela zauah Ministry of Petroleum and Natural Gas hnuaia Directorate General of Hydrocarbons (DGH)-in oil/gas khur (exploratory well) pali verh theihna license a pe. Hmun pathum an verh tawh a, mahse, hman tura lâk chhuah tham an hmu lo a, hmun pakhat verh tur an la nei. Chutih laiin, July 2020 khan an license a tàwp tawh.
Oil India chuan May 22, 2007 aṭangin Mizoramah oil leh gas zawn hna an thawk a, sq.km. 3,619 vela zaua khur panga verh tur an neih zinga pali an verh tawh. Anni hi May 21, 2021 khan an license a tàwp a, verh tur pakhat an la nei. Sorkar laipui chuan pandemic time compensation hmangin February 2022 thleng an license a pawtsei a ni.