Cong MLA-in October, 2020-a cancer enkawlnaa lirthei a pek hman a la ni lo

INC MLA C Ngunlian­chunga'n October 2020-a Mizoram State Cancer Institute (MSCI) hnenah lirthei (Eeco van) a pek chu nimin thleng khan hman a la ni lo a, registration pawh tihfel a la ni lo. Registration tih tuma hmalak a ni a, nimin khan an tifel hman mai thei nia thu dawn a ni.

MSCI tana C Ngunlian­chunga'n nikuma lirthei a pek tawh, tun thlenga hman a la nih loh chungchang hi tun hnaiah social media hrang hrangah hmuh tur a awm a, MPYCC-in June 3-a press release an siamah an tarlang tel bawk.

Nimin khan Vanglaini palaiin a hmunah enfiah a tum a, mahse, lirthei hi a dinna ṭhinah a awm tawh lo. Social media-a darh ta thlalaka langte leh a dinna hmun tuna a awm dan enin, a hmunhma danglam tawh tlem azáwng a awm.

Zawhna chhángin MSCI director Dr Zoramthanga chuan, MLA C Ngun­lian­chunga'n MSCI tana lirthei a pek chu sorkar dan angin bawhzui a nih thu a sawi a; sorkarah hman phalna lâk a ngai a, lirthei khalhtu leh enkawlna senso atante sorkar sum hmang turin phalna a ngai a, GAD leh Finance lamah phalna lâk a ngai tih sawiin, heng aṭang hian phalna an hmuh vek tawh thu a sawi.

MSCI Director sawi danin, lirthei an dawn hnuah registration tih a nih theih nan directorate-ah lehkha an kaltir nghal a, directorate lamin GAD leh Finance-ah an bawhzui. Hripui léng avangin file a kal muang a, phalna hmuh a nih hnuah Transport department-ah register tum a ni. Transport lamin vawi hnih an tihfel hnuah ambulance tur anga an register avangin a vawi thumna atan an ti ṭha leh a, chumi chhung chuan lockdown-in a nang ta a ni.

Dr Zoramthanga chuan, lockdown chhungin Tran­sport department-in motor registration an ti lo tih sawiin, "Transport ho pawh special-in kan request (ngen) a, anni pawhin chuti tak chu an ti a, registration khàr lai ni mah se vawiin (Ningani)-ah an tifel mai ang," a ti a; thil a kal fuh loh laklawh thu a sawi.

C Ngunlianchung'n lirthei a pek chu ambulance atan a ni lo tih sawiin MSCI Director chuan, "Min pekna êngah chuan ambulance tur ni loin, damlote a ṭul anga phurhna atan a ni. House visit-te pawh kan ti ṭhin a, chu mi atana hman pawh rilruah chuan a awm," a ti.

Thil a kal fuh lo chu pawi an tih thu sawiin, "A pawi khawp mai a, Pu Ngunlianchunga hnenah pawh thuphate kan va chawi a ni," a ti bawk.