2014 hnua a vawi khatna atan Dampa Tiger Reserve-ah sakei thla lâk fuh a ni

Dampa Tiger Reserve-ah tun hnai khan kum 2014 hnua a vawi khatna atan sakei thla lâk fuh a ni. Hemi chungchangah hian National Tiger Conservation Authority (NTCA)-in hma a lak chhunzawm dan tur hriat a la ni lo.

Vanglaini thu dawn danin, Dampa Tiger Reserve-ah hun eng emaw chen sakei a awm leh awm loh finfiah a nih tawh loh hnuah tun hnaiah Wildlife Institute of India (WII) camera chuan sakei thla a la fuh a, chu chu May 19, 2021 zing dar 5:44-ah a ni. Thlalak hi a fiah lutuk lo a, mahse, WII-in an zir chian hnuah sakei a ni ngei tih an finfiah.

Vanglaini palai zawhna chhangin Environment, Forest & Climate Change (EFCC) department hotute chuan, Dampa Tiger Reserve chu sakei a awm avanga tiger reserve atana puan a nih thu an sawi a, "Kum 2014 hnuah sakei hmuh a ni tawh lo a, WII camera hian sakei a la awm ngei a ni tih a rawn finfiah a ni," an ti.

EFCC department hotute chuan, Dampa Tiger Reserve chu tiger reserved ni si, sakei awm lohnaa NTCA-in kum 2018-a a puan zingah a tel thu sawiin, "Sum min petu ber NTCA hian sakei pawh awm hlei lo tih rilru an pu mai thei. Sakei hmuh ni lo mah se, thil dang hlu tam tak a awm thuin kan ṭang ve ṭhin," an ti a; sakei hmuh a nih tâkah chuan NTCA ngaihdan a dan deuh an rin thu an sawi.

Sakei thla lak fuh a nih thu WII aṭanga an dawn veleh Guwahati-a NTCA Regional Office an hriattir nghal thu sawiin EFCC hotute chuan, "Anni hian headquarters an hriattir ve nghal thu min hrilh. Mahse, formal tak chuan report kan la pe lo a, Chief Wildlife Warden hminga pek kan duh a, ani hi home quarantine-in an awm rih. An quarantine zawhah formal-a report pek a ni ang," an ti.