KHAWTHLIR

Covid-19 vaccine
National Health Mission mission director leh state immunization officer Dr Eric Zomawia chuan, Aizawl district-a kum 18-44 inkarte hnenah Pathianni tih loh ni dang zawngah ni tin Covid-19 vaccine pek ṭan leh tur a nih thu a tarlang. Covid-19 vaccine la tur hian CoWIN portal-a inziah luh hnuah booking tih tur a ni a, zing dar 8-ah booking tih tur a ni.

Thisen pe
Kolasib district-ah sport association pathumin nimin khan District Hospital-ah thisen unit 21 an pe a, petute chu Badminton Association aṭangin mi pakua, Basketball Association leh Football Association aṭangin aṭangin mi paruk ve ve, an vaiin mipa 17 leh hmeichhia pali an ni. June 3 khan Boxing, Body Building & Fitness Association leh Powerlifting pawlte'n unit kua an lo pe tawh bawk. District Sports Committee ruahman angin Kolasib district-a infiamna pawl hrang hrangte hian thisen an pe a ni.

Power awm dawn lo
Power & Electricity department chuan vawiin hian panel thar an dah dawn avangin chawhma dar 10 aṭanga tlai dar 4 thleng kawlphetha tihtawp a ni dawn tih an tarlang. Aizawl Venglai, Armed Veng, Chhinga Veng, Tuithiang Venglai, Ramthar Veng, Ramthar North, Electric Veng, Dawrpui, Zarkawt, Chanmari, Laipuitlang, Tuikual ṭhenkhat, Treasury Square leh Chaltlang veng ṭhenkhatte'n kawlphetha an hmu dawn lo a ni.

CM Relief Fund
Chief Minister's Relief Fund for Covid-19 ah nimin khan pawl pathum leh mimal pathumin Rs. 5,45,000 an chhûng lût.

Containment zone
Aizawl DC Dr Lalhriatzuali Ralte chuan Venghlui huam chhunga Hmarveng - Vanapa Section inkar chu Covid-19 containment zone-ah a puang. Hetih lai hian, May 24, 2021-a Khatla venga hmun ṭhenkhat containment zone-a puan tawh leh Dulte khuaa Zaupui containment area-a May 29-a puan chu nimin khan hlih a ni.

CADC Dy.Chairman
Chakma Autonomous District Council deputy chairman atan nimin khan Anil Kanti Chakma thlan a ni a, amah hi Bajeisora bial aṭangin MDC atan thlan tlin a ni. CADC-ah hian kumin April thlaah deputy chairman Mohesh Boran Chakma a bàn avangin deputy chairman an awm lo char char a ni.

ZPM-in lawmpui
ZPM party chuan thuchhuah siamin, MBSE-in High School Leaving Certificate Examination 2021 result felfai taka a tichhuak chu lawmawm an tih thu leh zirlai pass-te an lawmpui thu an tarlang a, "Hripui léng karah result felfai tak a awm theihna atana thawktute inpekna leh thawhrimnaah lawmthu kan sawi. Zirlai hlawhtlingte kan lawmpui a, an kal zelna turah duhsakna kan hlân a, hlawhtling lote pawh hnual mai lo a, nasa zawka ṭan laa bei hrâm hrâm turin kan chah a ni," an ti.

Meizial man
Assam Rifles leh Champhai Customs Preventive Force-te chuan nimin khan Champhai Chhungte-ah ram dang meizial bawmpui pakua an man. Foreign cigarette an man hi tualchhunga hralhna ang chuan Rs. 11,70,000 man a ni.

MLA-in tlawh
Aizawl South-I bialtu MLA C Lalsawivunga leh AMC ward-XVI councillor R Lalawmpuii te chuan nimin khan an bial chhunga local task force office-te leh hripui veite enkawlna Covid care centre leh community covid care centre-te an tlawh. MLA C Lalsawivunga leh councillor R Lalawmpuii te hian an bial veng hrang hranga LTF, CCC leh CCCC tan contactless sanitiser dispenser, PPE kit, home isolation kit leh disinfectant eng emaw zat an hlân a ni.