Covid-19 vei mi 2 thih belh

Nimin khan Mizo­ramah Covid-19 vei mi pahnih an thih belh. Hri­pui vanga thi zat sorkarin a chhinchhiah chu 48 a tling tawh a, June thla bikah ni li chhungin mi pariat an thi tawh.

Covid-19 vei State Referral Hospital (ZMC)-a enkawl lai Lalremsiama (44) h/o Hmangaihzuali, Sairang Dinthar chu Ningani zan zanlai dar 12 (nimin) khan a thi a, nimin zing dar 9 khan YMA Hall-ah vui a ni.

Lalremsiama hi Covid-19 positive a ni tih May 25, 2021-ah hmuh chhuah a ni a, May 30-ah SRH-ZMC-ah enkawl ṭan a ni. Amah hi zunthlum nei sa a nih thu sorkar thuchhuakin a tarlang.

Hripui vei SRH-a enkawl mek dang, Anil Kumar Rai (55), CRPF, Zemabawk chu nimin chawhma dar 9:55 khan a thi a, nimin tlai khan Tuirial Ṭiauzau-ah a ruang hàl a ni.

Anil Kumar Rai hi Uttar Pradesh lam mi niin, Lengpui Airport security duty a ni a, Covid-19 posi­tive a ni tih May 5, 2021-ah hmuh chhuah a ni a, hemi ní vêk hian SRH-ah dah luh a ni.

Nimin tlai dar 6 thlenga Mizorama Covid-19 vanga thi sorkarin a chhinchhiah zat chu mi 48 an ni a; June thla bikah mi pariat an thi tawh a, June 1-ah mi pali, June 2-ah mi pakhat, June 3-ah mi pakhat leh June 4-ah mi pahnih an thi a ni.