HSLC result-ah Education Minister lawm
School Education minister Lalchhandama Ralte chuan, hripui léng kara HSLC Examination 2021 leh result buatsaiha tihchhuah a ni chu thawktute ṭhahnemngaihna leh inpekna vang a nih thu leh chhuanawm a tih thu a sawi.
Lalchhandama Ralte chuan, Mizo mipuiin HSLC result an ngaihlu a, an nghahhlelh thu sawiin, "Hripui léng avangin India ram state dangah HSLC exam an nei hlei thei lo a, result siam dan turah an buai a, zirlaite an chîâi nasat thu news-ah kan hmuh hnem viau laiin, Mizoramah chuan result tihchhuah theih a ni," a ti a; School Education department leh MBSE-a thawkte'n fak an phù thu a sawi.
Hripui léng karah exam him leh felfai neih a nih thu sawiin Minister chuan, "Hemi neih theihna tura ruahmanna siampuitu State Executive Authority, LTF/ VTF-te leh Mizo mipui ṭawngṭaina chungah lawmthu ka sawi. HSLC result chhuaka hlawhtling te, nu leh pa leh an zirtirtute ka lawmpui tak zet a ni," a ti a; hlawhtling rih lote chu beidawng mai lo a, tumruhna leh huaisenna thar neia hma lam thlir turin a chah bawk.