Lungleiah RT-PCR khawl bun thuai turin MPCC Vice President-in sorkar a phût

Mizoram Pradesh Congress Committee (MPCC) vice president Lalsawta chuan, MPCC treasurer Zodintluanga Ralte-in nikum June thlaa Lunglei Civil Hospital tana RT-PCR kháwl a pek chu a rang thei ang berin hman theih tura bun thuai turin sorkar an phût tih a sawi.

MPCC Vice President hian nimin khan press statement a tichhuak a; Zodintluanga'n hripui vei leh vei loh enfiahna khawl nikum June thlaa a pek hman theih loha tun thlenga a la awm chu a pawi an tih thu sawiin, "A dawngtu sorkar hian chhuanlam fahrah tê tê siamin muangchànpui a tum tih hai rual a ni lo. Khawl hi a rang thei ang bera chhim lam mipui tana hman theih turin bun thuai turin kan phût a ni," a ti.

Hripui chu a ziaawm dawn emaw tih laiin a punlun chho zel tih sawiin Lalsawta chuan, "Random test rei lo tê neih aṭang khan hri hian min luhchilh tak zet tih a hriat theih," a ti a; mipui dam khawchhuah theih nan mi tinin an theih leh neih ang anga an beih laia hri dona tura sorkarin inrenchemna kawng a hawi duh lo tlat pawh chu chhiah petu mipui tan a tha nat thlak hle tih a sawi.

Congress Vice President tarlan danin, hripui a lèn tirh aṭangin sorkar laipui chuan Lok Sabha leh Rajya Sabha MP mi 700 chuang hlawh 30%-in a titlem nghal a, MP fund pawh kum hnih chhung atan hman a phal lo nghal a ni. Hmasawnna lam thawhna tur tam tak pawh hripui do nana hman turin a ti nghal bawk.

Lalsawta chuan, inrenchem hun a ni tih sawiin, "A loa kan awm theih, thla tina sum tam tak sênna - SEDP hnuaia board 14 te, MPSC awm reng laia ṭhalai lehkhathiamte tibeidawng thei Mizoram Subordinate Service Selection Board-te hi ṭhiat thuai se. Thihna kotlanga mipui kan din tawh laia sum tam tak senna tur Rawmi supply leh PAHOSS-te pawh kaltlangpui lui lo hrâm teh se," a ti.

MPCC Vice President chuan, sorkar chu puitling rilru pu tura chahin, "Opposition MLA leh party dangte pawh ring ngam a, hripui do tura a rêlnaahte telh nacháng hriat pawh a hun ta," a ti a; thlei bik leh dim bik nei loin, puitling taka hripui do turin sorkar a ngen a ni.