Expert team-in LCH chhâwng chung lamah RT-PCR laboratory a siam theihah an ngai

Lunglei Civil Hospital (LCH)-ah RT-PCR laboratory siam theih a nih leh nih loh enfiah tura Mizoram sorkarin June 2020-a expert team a tirhte chu RT-PCR for Chhimbial chuan thil awmzia an zawtfiah a, expert team hotuin ziakin an chháng. LCH building chhawng chung lama pindan chu RT-PCR bunna atan cheibàwl mai theih tura an ngaih thu a tarlang.

RT-PCR for Chhimbial-in LCH chu RT-PCR lab atana pawm tlak a nih leh nih loh an zawhna chu expert team hotu chuan, "Building chhâwng chung lama room en a ni a, a room awm dante enin, RT-PCR bun theihna tura cheibàwl mai theih tura ngaih a ni ta a ni," a ti.

Chhannaa a lan danin, LCH-ah RT-PCR laboratory din theihna tur hmun hrang hrang an en kual a, an en hmasak ber Microbiology lab hman lai chu room a têt bakah, a awmna hmun chu mipui kaltlangna corridor nen insi reng a nih avangin a remchang loa ngaih a ni. Pindan dang an en zel a, remchan lohna a awm zel a; a tàwp berah building chhâwng chung lama room an en a, room awm dante enin RT-PCR bunna turin cheibàwl mai theih turah an ngai ta a ni.

Hmun remchanga an ngaih chu a remchan theih dan, harsatna awm thei, hmalak dan turte sawiho a ni a, a bul hnaia damlo awmna (ward) chu a ṭul anga sawn dan tur ruahman theih a ni tih sawi a ni. Room kalpawhna atan gate pakhat hman a nih theih dan tur te, gate leh room inkar panna corridor pawh vantlang kal lohna tur atana ruahman theih a nih dan tur te, detail plan leh estimates siamtu turte enho leh sawiho a ni bawk.

Chhannaah chuan, laboratory cheibawl a, RT-PCR hman theiha peih turin tih ngai leh ṭul a tam tih tarlan a ni a, "Vawi leh khata peih theih a nih lohzia an hriat chian em avangin hmalakna hmasa (present requirement) ṭul angte pawh team hian kan siam nghe nghe," tih a ni.

Expert team thil hmuh dan chu HME Director ṭawngkam avangin an hlauthawng zo a, expert an ni rêng em tih zawhna chu, "Kan theih ang tâwkin kan experience leh kan hriatna thawh khawmin, min tirh chhan hlawhtlinna turin kan thawk maiin ka hria. Report thehlutin ṭawngkamin a tlangpui kan sawi bawk," tia chhan a ni.

Team hotu chuan, report an thehluh hnuah zawt chiang emaw, sawifiah ngai awm angte zawh an nih tawh loh thu te, chanchin thara puan chu an report kal zui dan a hriat leh hmasakna ber a nih thu te, media lamah puan chhuah a nih dan a hriat loh thute a tarlang a, "Kum khat a ral hnuah kan report kha a hman tlak loh tia sawi an lo awm palh a nih pawhin, a siam ṭhat dan an hre turah ka ngai mai e. LCH kan tlawhna report hi sorkarin a kawl turah ka ngai a. Keini team avanga hlauhthawnna in lo nei hi a pawi ka tiin hrehawm ka ti hle a ni," a ti.

LCH enfiah tura expert team tirhna order chu Mizoram sorkarin June 14, 2020-ah a tichhuak a, chumi ang chuan team chuan LCH an enfiah. Expert team-ah hian RIPANS Department of Pharmacy-a HoD Dr H Lalhlenmawia, MZU Department of Biotechnology-a professor Dr John Zothanzama, PUC-a assistant professor Dr Vanramliana te an awm a ni.