Covid-19 vei an pun zel avangin A ṭum 4-na atan total lockdown pawtsei
Mizoram sorkar chuan Covid-19 vei hmuh chhuah a tlakhniam theih loh avangin a ṭum lina atan total lockdown a pawtsei leh a, June 14 zing dar 4 thleng a awh ang.
Inrinnia Mizoram State Disaster Management Authority (SDMA)-in order a tihchhuah chuan, "Mizoram chhungah Covid-19 dona atan hun rei tak chhung lockdown kalpui a ni tawh a. Heti chung hian hri kai thar tam tak an la awm zel avang leh hri kaiin kiam lam a la pan theih rih loh avangin inkhuahkhirhna hi kalpui chhunzawm zel a ṭul niin a lang," a ti.
Vawiin zing dar 4 aṭanga June 14, 2021 zing dar 4 thleng total lockdown kalpui turah hian inkaihhruaina, Standard Operating Procedure (SOP) chu May 29, 2021-a tihchhuah tawh, May 31 aṭanga June 7 thlenga hman tura tih chu hman zui tur a ni. Ṭum dangah chuan total lockdown pawhsei a nihin SOP tihdanglam hret a awm ṭhin a, tun ṭumah chuan tihdanglam a awm lo.
Covid-19 thawh hnihna a darh hnuah Mizoram sorkar chuan April 20, 2021 aṭangin inkhuahkhirhna a kalpui a, chumi hnuah lockdown kalpui lehin, May 10 aṭangin total lockdown a puang. Hripui vei an tlakhniam theih loh avangin total lockdown hi ni sarih chhung atan pawhsei a ni ṭhin a, tun ṭuma pawhsei leh tâk hi a ṭum lina a ni.
SOP ang chuan, AMC area-ah total lockdown khauh taka kalpui tur a ni a, district headquarters-ah chuan district thuneitute'n kaihhruaina hranpa an siam ang a, khaw dangah chuan inkhuahkhirhna thlahdul hret a ni thung.
Hetih lai hian, Mizoram Kohhran Hruaitute Committee (MKHC) leh Aizawl City Local Council Association (ACLCA) hruaitute chuan June 5, Inrinni khan chief minister Zoramthanga chu a pisaah an hmu a, hripui léng mek chungchang an sawipui.
MKHC hruaitute chuan, tun dinhmunah hripui vei zat a la tlakhniam theih loh avang leh mitthi an pun zel avangin, mipui him zawk nan inkhàrkhip (lockdown) chu khauh taka kalpui zel ṭha an tih thu an thlen a ni. Chief Minister pawhin, MKHC ngaihdan chu a ṭâwmpui thu leh thawktute leh hotute a lo hrilh tur thuin a chháng a ni.