Lungleiah RTPCR kháwl bun turin MLA Zodintluanga'n CM a ngen

Congress Legislature Party (CLP) leader Zodintluanga Ralte chuan June 5, Inrinni khan chief minister Zoramthanga lehkha thawnin, June 26, 2020-a Lunglei Civil Hospital (LCH) tana RTPCR khawl a pek chu bun a nih theih nan hma la turin a ngen.

Zodintluanga Ralte chuan, nikum June 26-ah chhim lam mipui hman atan LCH-ah RT-PCR kháwl a pe a, a lei hmain mithiam­te hnenah a hman ṭangkai dan tur pawh a zawtfiah tih sawiin, "Sorkarin Lungleia Expert Team a tirhte pawhin LCH building awm saah a dahna tur laboratory siam theih a nih thu sorkarah an thlen a. Unofficial level-ah Health department lam ngaihdante zawtin LCH thuneitute hnenah ka hlan a, lawm takin min lo dawnsak a ni," a ti.

A rin leh beisei loh deuhin thil a kal a, RT-PCR kháwl a pek chu politics inbeihna hmanruaah a ṭang ta tih sawiin Zodintluanga chuan, "Politics inbeihna hial a thleng chho hi a hrehawm ka ti a, hripui doa theihtawp chhuah mek sorkarna chelhtute pawhin hetianga inbeih hi in duh ka ring lo," a ti a; hripui léng avangin inbeih hun a nih loh thu a tarlang.

Sorkarin LCH-ah TrueNAT Quattro dah belh an tum chu ṭha a tih thu a sawi rualin Zodintluanga chuan, TrueNAT leh RT-PCR chu swab test a inchak hleih em avang leh chhim lamah hripui vei an tam tak zel avangin TrueNAT ringawtin an mamawh a phuhru zo lo tih a sawi a, "Sample test rang thei zawk leh a rintlak gold standard an tih ngei RT-PCR khawl hi chhim lam mipui tana hman theih tura bun turin ka ngen che a ni," a ti.

CLP Leader chuan, hripui léng vangin Mizoram chhim lam mipui an mangang a, sorkar an au mek tih sawiin, "An theih ang tâwkah an tlanchhe lo tih lantir nan mi ṭhahnemngaite'n RT-PCR bun a nih theih nan vehbûr an khawn mek a, an manganzia a tilang chiang hlein ka hria," a ti. Mipui mangang au aw chuan ram hruaitu lu ber a auh ei ngei a rin tlat thu sawiin, "Zoram tana i ṭhat lai hun zawng petu i ni a, he hun harsaah pawh hian Mizoram chhim lam mipui tana ṭha ber tur ruahmanna i siam ngei ka ring tlat a ni," a ti bawk.

Hripui doa ṭanrual a hun lai taka RT-PCR kháwl hmanga politics-a inbeihna a tàwp theih nan te, politics inbeihnaa hmatheh atan sorkar hnathawkte hman an nih tawh loh nan leh, political party-te chu hripui doin an ṭangrual a ni tih mipuiin an hriat theih nante a thuneihna hmang turin Zodintluanga Ralte chuan Chief Minister chu a ngen a ni.