Ni ruk chhungin hripui vei mi 13 thi

June 4, Zirtawpni khan Mizoramah Covid-19 vei enkawl lai mi panga an thi a, thi an tam ber ní a ni. June 5, Inrinni khan mi pahnih an thi bawk. June thlaah ni ruk chhungin mi 13 an thi tawh.

Inrinnia chhuak Vanglainia tarlan hman loh hripui vei Zirtawpni zana thi mi pathum an awm a; SRH-ZMC-a enkawl lai K Lalchhanhimi (69) w/o H Lalmawia, Saron Veng, Aizawl Zirtawpni zan dar 7:10-ah a thi a, a tûk, Inrinni chawhma dar 10-ah Saron Veng Recreation Centre-ah kohhranin an vui.

K Lalchhanhimi hi Covid-19 positive a ni tih May 23, 2021-ah hmuh chhuah a ni a, hmuh chhuah a nih ní hian damdawi-inah enkawl nghal a ni.

Covid-19 vei enkawl lai B Lallawm­zuali (27) w/o Lalhriat­renga, Darlawn Venghlun chu zan dar 9:30-ah SRH-ah a thi a, Inrinni khan a awm mekna Ramhlun South-ah vui a ni.

Thu dawn danin, B Lallawmzuali hi Covid-19 positive a ni tih May 19, 2021-ah hmuh chhuah a ni a, May 20-ah damdawi-inah dah luh niin, May 30-ah ICU-ah ventilator hmanga enkawl ṭan a ni. Hripui a vei tih hmuh chhuah a nih lai hian nau hrám tawh tak a pâi a, May 22, 2021 khan a nau pâi chu ṭha takin zai chhuah a ni a, naute dinhmun a ṭhat thu sorkar thuchhuakin a tarlang.

Zirtawpni zan vêk khan dar 10:20-ah Hmingthanzuala (34) s/o Lalfakzuala, Dawrpui chu Covid-19 vangin SRH-ZMC-ah a thi a, Zirtawpni zana Dawrpui Kohhran Centenary Hall-ah lumen a nih hnuah Inrinni chhun dar 12 khan vui a ni.

Hmingthanzuala hi Covid-19 positive a ni tih May 19-ah hmuh chhuah a ni a, May 25 khan SRH-ah dah luh a nih thu sorkar thuchhuakin a tarlang. Amah hi natna dang nei sa a nih loh thu, Dawrpui aṭanga thu dawnna chuan a sawi.

June 5, Inrinni chhun dar 1 khan C Parchhingi (71) w/o Hauhnuna (L), Electric Veng, Aizawl chu SRH-ah Covid-19 vangin a thi a, Inrinni zan khan YMA Hall-ah lumen a nih hnuah nimin chhun dar 12 khan vui a ni.

Sorkar thuchhuak tarlan danin, C Parchhingi hi natna dang nei sa a ni a, Covid-19 vei a ni tih May 9, 2021-ah hmuh chhuah niin, May 11-ah SRH-ZMC-ah dah luh a ni. A pasal Hauhnuna (76) pawh June 1, 2021 khan Covid-19 vangin a thi tawh bawk.

Inrinni vêk khan zan dar 10:30-ah Covid-19 vei SRH-ZMC-a enkawl lai R Ralkunga (92) f/o Vanlalruati, Vairengte chu a thi a, nimin khan an khuaah vui a ni.

R Ralkunga hi thisen sáng nei a ni a, hripui vei a ni tih May 28, 2021-ah hmuh chhuah niin, hemi ní hian SRH-ah dah luh nghal a nih thu sorkar thuchhuakin a tarlang.

Sorkar record angin Mizoramah Covid-19 vanga thi mi 53 an awm ta a, June thla bikah nimin tlai dar 6 thleng khan mi 13 an thi tawh a ni.