KHAWTHLIR

Thisen pe
June 5, Inrinni khan Lairam Isua Krista Baptist Kohhran Ṭhalai Pawl, Lawngtlai College Veng Bial thisen pek an huaihawt a, mipa 42 leh hmeichhia 13-te'n Lawngtlai District Hospital tan thisen unit 55 an pe. Evangelical Church of Maraland KTP, New Colony Branch pawhin an kohhran hall-ah District Hospital tan thisen unit 11 an pe a, a petute mipa pakua leh hmeichhia pahnih an ni.

Containment zone
Aizawl DC Dr Lalhriatzuali Ralte chuan Dinthar venga hmun ṭhenkhat chu containment zone-ah a puang. Bungkawn, Bethlehem Vengthlang, Electric Veng leh Zarkawt venga hmun ṭhenkhat, containment area-a puan tawh chu a hlîp thung.

Admission fee Tihhniam duh
MZP chuan thuchhuah siamin, college leh school admission tih a hun chho dawn a, sorkar zirna-ina admission fee chu 50% tala tihniam turin sorkar an ngen. MZP chuan, "Lockdown chhungin hna thawh theih a nih loh avangin mitin kan harsa hle a, eichawp zawngte dinhmun a ṭha lo leh zual. Hengte avang hian Mizoram sorkar enkawl zirna-ina admission fee chu 50% tala tihniam turin thuneitute kan ngen a ni," an ti.

Vellore-ah Mizo thi
Vellore-a awm mek Covid-19 vei PC Lalremmawia (42) h/o Zothantluangi, Model Veng, Aizawl chu nimin chhun dar 11:45 khan Christian Medical College-ah a thi. A ruang hi Mizoramah hawpui theih beisei a ni a, Vellore Mizo Welfare hruaitute'n an buaipui mek. PC Lalremmawia te hi an fanu thisen cancer enkawl tura CMC pan an ni a, Vellore-ah hian a nupui leh an fanute nen hripui an kai vek a ni.

Tanpuina sem
Serchhip district-in May 17, 2021-a CM Relief Fund (CMRF) aṭanga chhungkaw harsate ṭanpuina tur Rs. 2,50,000 a dawn chu District Task Force ruahman angin village task force 54 hnenah sem a ni. Ṭanpuina hi bialtu nodal officer-te hnenah VTF-te'n lak tur a ni a, actual payee receipt leh voucher-te chu June 10, 2021 ral hmain DC hnenah nodal officer kaltlangin thehluh tur a ni.