World Environment Day hman a ni

June 5, Inrinni kha World Environment Day a ni a, Mizoram hmun hrang hrangah hman niin, thupui chu 'Ecosystem restoration' (Ecosystem ngai awh leh tura siam thar lehna) tih a ni.

World Environment Day pual hian Mizoram University chuan webinar an buatsaih a, Environment, Forest & Climate Change (EFCC) minister TJ Lalnun­tluanga'n PCCF conference hall aṭangin a hmanpui.

EFCC Minister chuan, "Kan ram boruak, sik leh sa nuam tak hi hmasawnna kawng hrang hranga ke kan pênnaah hian kan tichhe tur a ni lo tih mi tinin kan hriat reng a ngai," a ti a; India danpuiin khua leh tuite ti tura a phût zinga mi a nih thu a sawi.

Ramngaw humhalh leh vawnhim chu mi tin mawhphurhna a nih thu sawiin Minister chuan, "Thing phun chungchangah pawh, phun dan awmze neia kalpui a ṭul. Phun tam satliah aiin awmze nei taka phun chuan ecosystem venhimnaah kawng ro a su zawk ang," a ti.

Webinar-ah hian MZU pro-vice chancellor Prof. JK Patnaik chuan World Environment Day thupui a sawi a, Indian Institute of Remote Sensing, Dehradun leh NEHU-a professor-te'n thu an sawi bawk.

World Environment Day hi Champhaiah pawh hman a ni a, Forest Division & Champhai Forest Range-a thawktute'n Mualzen rama Forest Nursery-ah thing phun hnatlang an nei. Mi 35 velin thing chi hrang hrang Herhse, Ngiau, Theihai, Ashoka thing, Búng, Rihnìm, Zawngṭah leh Thakthing ṭiak 150 an phun a ni.

Mamit Forest Division pawhin Mamit khaw luh hmaa Zongaw chhunga NH-44A kawngpui sirah thing ṭiak 60 an phun a, thing phun sa bul vel an tifai bawk. Mamit DFO PC Lalchhandama chuan, "Mihring pung zel avangin loh theih lohnaa kan ramngawte an chereu mek avangin, a theihna hmun hmunah thing phun a, ramngaw siam belh chu kan tihmâkmawh a ni," a ti.

Mizoram Pollution Control Board (MPCB) hnuaia Mizoram ENVIS Hub leh NGC-Eco Club-te pawhin World Environment Day-ah hian Inrinni zan dar 8 khan Mizorama Eco Club zirlai naupang, zirtirtu leh a tui mite pualin webinar an buatsaih a, mi 366 an tel.

Webinar-ah hian MPCB member secretary leh NGC-Eco Club nonal officer C Lalduhawma'n thu a sawi a, MZU-a Forestry assistant professor Dr. David C Vanlalfakawma'n thupui 'Ecosystem restoration' tih a sawi.
Mizorama sikul Eco Club-te pualin 'Tuihna humhalh' tih thupui hmangin Online Article Writing Competition leh, 'Ecosystem restoration' tih thupui hmangin college zirlaite tan Online Short Speech Competition an buatsaih. Day hmannaah hian result puan a ni a; Article Writing Competition-ah Zothanpuia, Bethlehem Vengthlang H/S pakhatna niin, Short Speech Competition-ah Lalrempuia, Lawngtlai College pakhatna a ni.

World Environment Day 2021-ah hian Government Aizawl College-a Eco Club hmalaknain Sikulpui/Sikulsen hotute leh Mission Veng Cheitu Pawlte ṭangkawp chuan Sikulpuikawnah thing an phun. Govt. Aizawl College principal Prof. C. Sangluaii, Sikulpui/Sikulsen headmaster Zonunmawia bakah Mission Veng Cheitu Pawl hruaitute leh Eco Club hruaitute'n thingte hi an phun a ni.

United Nations Organisation chuan kum 1972 khan June 5 chu World Environment Day atan a puang a, kum 1974 aṭangin mumal taka hman ṭan niin, kum 1987 aṭangin kum tin thupui bik neia hman ṭhin a ni. UNO chuan kumina Environment Day thupui chu kum 2021-2030 thleng awh turin a puang a, 'UN Decade for Ecosystem Restoration' tih a ni. UNO hnuaia peng hrang hrang - UNEP, FAO leh WHO-te nena thawkhoin hma lak mek a ni.