ZMC ICU-a awmna senso a hautak : Awm man kan ṭhíng nghal ngai lo - ZMC

Covid-19 dedicate hospital Zoram Medical College (ZMC) hotute chuan intensive care unit (ICU)-a Covid-19 veite awm man a hautak thu an sawi a; chutih rualin, "Awm man kan ṭhing nghal ngai lo," an ti.

Vanglaini palaiin a kawmnaah ZMC director Dr John Zohmingthanga leh doctor-te chuan, Covid-19 vei ICU-a dah zingah ṭhenkhat chu thla khat vel awm an awm rualin, rei lo tê awm hnua chhuak nghal mai pawh an awm thu an sawi a, "ICU bill hi a tam ber chu Rs. 4,30,000 a ni a, Rs. 80,000 vel báwr a tam," an ti a, Rs. 20,000 velte pawh a awm thu an sawi.

ZMC Director chuan, "ICU-ah hian mi pakhatin ni khatah oxygen bûr nga vel an hîp a ngai a, bûr lian tihkhahna hi Rs. 350 a ni a, bur nga atan Rs. 1,750 sênte a ngai. A búr tê hi thun khahna man Rs. 100 a ni thung. Damlo enkawltu, doctor, nurse, etc. ten PPE nen rim takin an enkawl a, a hautak hle a ni," a ti.

Bill siamtute'n buaipui tur an ngah thu sawiin ZMC hotute chuan, "Mitthi an awmin emaw, dama an chhuak emaw pawh ni se, bill an nawr nghal ngai lo. Bill siamtute hian lo pe vat r'u tih ṭawngkam an hmang ngai lo. An thi emaw, an dam emaw pawh ni se, heta awmte hi an chhungte quarantine an ni deuh zel a, an harsatna kan hrethiam," an ti a; damdawi-inah a thlàwna pêk theih zawng zawng sorkarin a pêk thu an sawi.

ZMC hotute chuan, ICU-a awm a hautak thu sawiin, "Damlote senso pawh a tam ber chu cheng nuai 4 chuang a ni a, leiba rûl vat turin tu mah ṭhìn zui nghal an ni ngai lo. Pharmacy canteen-ah pawh damdawi man bá nuai tam tak a awm mek a ni," an ti.

Vanglaini palai zawhna chhangin ZMC Pharmacy canteen nghaktute chuan, a ṭhenin damdawi man an pe nghal a, a ṭhenin hriatthiam an dil a, a ṭhenin a hnu deuhah an pe tih an sawi a, "Mitthi an awm phei chuan, bá lo ṭhìn nghal a zahthlak a, Pharmacy canteen kan nih avangin damdawi pek theih loh kan neih a rem lo," a ti a, an dawrah leiba tlingkhawm nuai tam tak a awm thu an sawi.

ZMC hotute chuan, tun hnaia Covid-19 vei SRH-ZMC-a thi mi pakhat chu damdawi-in awmna senso cheng nuai 4 vel a nih thu leh pe turin ZMC lamin an ṭhíng nghal nia sawi chu thu dik lo a nih thu leh ICU-a awmna senso a hautak thu an sawi.

June 4, 2021 zana thi Ramhlun South/Darlawn Venghlun mi hmeichhe pakhat chu damdawi-ina a awm man cheng nuai 4 vel a nih thu leh ZMC-in pawisa chu pe turin an ṭhíng zui nghal nia social media-a thu thehdarh chu a dik lo tih sawiin ZMC hotute chuan, "An bill hi hriat kim chiah la ni lo mah se, a khawihtute kan chhûttir thuak thuak danin, pharmacy canteen bill hi Rs. 90,000 vel, ICU awm man Rs. 10,000 vel leh thisen endik man Rs. 1,000 vel, a vaiin cheng nuai khat vel a ni," an ti.

Mitthite chhungkuain Health Care Scheme an zawm thu te, an harsat avangin Poor Fund a dawn thu leh mimala ṭanpuina lutte an chhût fel hunah bill chu a tam lutuk dawn loa an hriat thu an sawi bawk.