Myanmar aṭanga raltlante ṭanpui

Mizo Zirlai Pawl (MZP) leh Mizo Society of America (MSA) chuan June 1-4 chhung khan Siaha leh Lawngtlai district-a Myanmar aṭanga ráltlân Zo hnahthlakte ṭanpuina an hlân.

Ṭanpuina sem tur hian MZP hruaitute chuan an president B Vanlaltana hoin June 1, 2021 khan Aizawl an chhuahsan a, Mara Students' Organisation (MSO) hruaitute nen ṭanpuina sem dan tur an sawiho. Siaha district khaw pangaah Myanmar aṭanga Zo hnahthlak ráltlânte chhawmdawl nan buhfai, alu, dailuah leh pawisa an pe a ni.

MZP leh MSA-te hian Central Young Lai Association (CYLA) hruaitute hnenah Lawngtlai district-a Zo hnahthlak râltlânte chhawmdawlna atan leh a ṭul anga hman atan Rs. 1,20,000 an hlan bawk.

MZP chuan thuchhuah siamin, "Myanmar ram buai vanga kan unau Mizorama rawn chhuk thlate chhawmdawl hna MZP chuan a kalpui reng a, tun ṭuma ṭanpuina hi Mizo Society of America-in Rs. 4,00,000 min pek aṭanga sem a ni," an ti.