MLA leh pâwlte'n ṭanpuina an sem

Hachhek bialtu MLA Lalrindika Ralte chuan June 5, Inrinni khan a bial chhunga village task force-te tlawh kualin, Covid-19 dona atana hmanraw pawimawh hrang hrangte a hlân a, Saikhawthlira Mizoram police awmte tan buhfai leh chawhmeh a

pe bawk.

Lalrindika Ralte chuan, hripui léng avanga chhuanchham an awm lohna turin theihtawpa a ṭan zel tur thu sawiin, "Politics chu Pathianin rawng kan inbàwlsak tawnna hmanrua atana min pek a ni a, a thianghlimna tura thâ kan thawh thei lo a nih pawhin, a tibawlhhlawhtu kan ni tur a ni lo. Kan u leh nau, ṭhenawm khawvengte'n harsatna an tawh hunah hian eng ang hruaitu nge kan nih a, mi tan eng ang takin nge kan chêt chhuah ngam tih fiahin a awm zel a ni," a ti.

Aizawl Two Wheeler Taxi Association (ATTA) chuan Congress party aṭanga ṭanpuina an dawn chu Inrinni khan an member khawsak harsate hnenah an sem a; buhfai, dailuah, tél leh thil dangte an pe a ni.

NE Khawdungsei, Chiahpui, Khawkawn (KCK) Welfare pawhin hripui léng avanga harsatna tâwkte tana vehbûr an khawn tlingkhawm Rs. 1,43,850 aṭangin chhungkaw 55 hnenah Rs. 1,25,000 an sem bawk.