Admission fee 30%-in tihniam dawn
Hripui léng mek leh inkhârkhip avanga mipui harsatna chhâwk zângkhai nan sorkar sikul bakah, sorkarin zirtirtu hlawh leh ṭanpuina a pek higher secondary school-ah pawl 11 admission fee 30%-a tihhniam a nih dawn thu nimin khan School Education minister Lalchhandama Ralte-in a puang.
School Education Minister hian nimin khan Mizo High School-in an sikul tuala HSLC 2021 top ten-a tling leh subject topper an neihte chawimawina an buatsaih a hmanpuinaah thu sawiin, sorkar sikul bakah, adhoc aided, deficit leh lumpsum aided school-ah pawl 11 admission fee 30%-a tihhniam a nih tur thu a puang a, "Mimal sikul dinte pawh mipuiin harsatna kan tâwk tih hriaa admission fee titlem ve turin ka sawm che u a ni," a ti.
Lalchhandama Ralte chuan, zirlai nu leh pate chu an chhungkaw sum leh pái lâk luh mila an fate zirna ngaihtuah turin a chah a, "Mimal sikul, thla tina man chàwi ngaia luhtirte chu fee pe thei tura ngaih an ni a, luh tawh hnua fee chawi tur zat tihtlem leh phût ai chuan, a thlàwna zir theihna sorkar sikul ṭha tak tak a awm a ni," a ti a; sorkar sikula zirtirtute chu mi tling tak tak an nih thu a sawi.
Lalchhandama chuan, Mizo HS chu missionary-te din a nihna a lang zel a, a bul ṭantute inpekna vawn nun a ni chu lawmawm a tih thu a sawi a; zirlai ti ṭhate chu kawng laka tlu mai lo a, ram leh hnam mamawh chhànna ni turin a chah. Mizo H/S hall tur cheng nuai 495 sênga sak mek a hmunah a tlawh nghal a ni.
Education Minister chuan, HSLC 2021-a zirlai pass awm lohna sikul pasarih zinga pakhat chu sorkar sikul a nih thu sawiin, chu'ng sikulte chu insawifiah tura hriattir an nih thu a sawi bawk.
Mizo HS hian HSLC 2021-ah candidate 295 an nei a, chu'ng zinga 93.56% chu an pass. An zirlai Lalnunmawii chu 10-na a ni a, Lalsangpuii leh C Lalramngaihzuali te chu Social Science subject-ah topper an ni bawk. Lalnunmawii hnenah laptop hlan a ni a, subject topper pahnih hnenah tablet hlan a ni.
School Education Minister hi bialtu MLA C Lalmuanpuia leh School Education director James Lalrinchhana ten an ṭawiawm.