Covid-19 dona hmanrua rawn thleng

Health & Family Welfare (HFW) department chuan nimin khan Union Health minister Dr Harsh Varshan, Life Insurance Company (LIC) leh WHO India te aṭangin Covid-19 laka invênna hmanraw chi hrang hrang an dawng.

Sorkar thuchhuah tarlan danin, Covid-19 donaa thawktute'n PPE an indaih lohna phuhrûksak turin Health minister Dr R Lalthangliana'n Union Health minister Dr Harsh Varshan hnenah ngenna a thlen a; Union Minister chuan tihlawhtlingin, nimin khan PPE 7,500, N-95 mask 20,000, kutkawr 20,000, tarmit (goggles) 20,000 a lo thleng.

PPE hi 20,000 lo thleng tur a ni a, nimina thleng 7,500 bak pawh a rawn thleng thuai dawn niin sorkarin a tarlang. Hmanrua rawn thlengte chu Central Medical Store, Zemabawka thawkte'n an lo dawng a ni.

LIC chuan corporate social responsibility aṭangin HFW principal director Dr F Lallianhlira hnenah PPE 100 an pe a, Aizawl hmun hrang hranga containment zone-ah PPE set 50 an sem nghal. WHO India pawhin Principal Director hnenah respirator mask 5,000 an hlân bawk.