Swab sample endik rûnpui nei turin Hawla'n Mizoram sorkar a ngen
Mizoram Pradesh Congress Committee (MPCC) president Lal Thanhawla chuan, Covid-19 veite rang taka hmuh chhuah zung zung a nih theih nan leh hripui veite rang taka enkawl an nih theih nan swab sample endik rûnpui (mass detection drive) nei turin Mizoram sorkar a ngen.
Lal Thanhawla chuan nimin khan thuchah a tichhuak a; Covid-19 léng thawh hnihna chhut chah nan April 19, 2021 aṭanga lockdown kalpui a ni chungin hripui vei an la pung zel tih a sawi a, "Thla hnih dáwn lai kan inkhung tawh a ni. Total lockdown hi thil ṭul tak niin lang mah se, total lockdown chhunga hri vei pun chak dante thlirin, hripui do hneh tur chuan inkhàrkhip piah lamah kawng dang dap tel a ngai ta niin a lang," a ti.
MPCC President chuan, hripui léng thawh hnihna chu a thawh khatna aiin a veite'n an la na zawk tih sawiin Lal Thanhawla chuan, "Nunna chán pawh nasa takin an tam zawk a, natna lang chhuak pawh a hma ai chuan an tam hle. Hei hian a entir chu, hri káite hian thawh khatna hun lai ai khan enkawlna an dawng har a, natna a lang chhuak hman a ni," a ti a; dinhmun khirh taka awm, oxygen pek ngai leh ICU-a enkawl ngai an tam phah nia a lan thu a sawi.
Hripui veite rang taka hmuh chhuah zung zung a, symptom a lan hmaa enkawlna pek vat a, enkawl dam zung zung a ngai nia a lan thu sawiin Lal Thanhawla chuan, "Hei hi damdawi inenkawlna lama kan dinhmun nena thlirin kan tih ngei ngei tur niin a lang. CCC leh CCCC-a enkawl dam mai theih an la nih laia hri veite hian enkawlna an dawn a ngai. Chutiang a nih loh chuan Referral Hospital leh ICU leh ventilator-a enkawl ngai kan pung zel dawn," a ti a, sorkar tan harsatna lian tak a ni thuai dawn tih a tarlang.
Congress party President chuan, Covid-19 veite rang taka hmuh chhuah a nih theih nan leh rang taka enkawlna an dawn theih nan mass detection drive nei turin Mizoram sorkar a ngen a, "Hetiang zawnga hripui dona kan kalpui a nih loh a, total lockdown hmang ringawta kan do dawn a nih chuan, Mizoram mipui tam zawk hi inkhai chhuah leh harsa khawpa dinhmun chhiaah kan ding hman ang tih a hlauhawm a ni," a ti. Lal Thanhawla chuan, Mizoramah Covid-19 vanga thi mi 50 chuang an awm tawh tih sawiin, hripui tuartute leh nunna chánte a tawrhpui tak zet thu a sawi bawk.