Chhel taka insangmar hrâm turin Health Minister-in mipui a ngen

Health minister Dr R Lalthangliana chuan, Covid-19 chhut chahna atana total lockdown puan avangin eizawnna kawngah harsatna tâwk tam tak an awm tih sawiin, "Dawhthei leh tuarchhel takin i insangmar leh hrâm hrâm ang u, nunna a pawimawh hmasa ber si a," a ti.

Vanglaini palaiin a kawmnaah Dr R Lalthangliana chuan, ni 40 chuang inkhàrkhip hnuah pawh hripui léngin ziaawm lam a la pan theih loh avangin chawlhkar khat dang inkhàrkhip chhunzawm leh a ni tih a sawi a, "Lockdown tur leh a hun chhûng pawtsei tura thutlukna siam hi kan hotute tan thutlukna siam harsa tak a ni," tiin, kil tin aṭangin an thlir a, mipui him tlànna tur ber ngaihtuah a ngaih thu a sawi.

Health Minister chuan, inkhàrkhip vanga eizawnnaa harsatna tâwk tam tak an awm thu sawiin, "Mahse, inthlahdul ila, hri kai kan pun phah leh si chuan, eizawnna kawnga thawk chhuaktu berte'n hri an kài a, a chhe ber kan tâwk a nih phei chuan a pawi thui zawk dawn. Hripui hian tu mah min thliar hrang si lo, kan inenkawl séng lo ang tih a hlauhawm a ni," a ti.

Dr R Lalthangtliana chuan, MKHC, CYMA, MHIP leh local task force hruaitute'n Mizoramah rilṭáma thi an awm lohna turin theihtawp an chhuah thu leh a ṭul anga luan chhuah zel an tum thu an sawi tih a sawi a, "Kan CM pawhin chhuanchham leh rilṭáma nunna chán kan awm a phal dawn lo tih a sawi tawh," a ti a, Mizoram dinhmun chu ṭan rual hun a nih thu a sawi.

Theihtawp chhuaha infuih tawn a pawimawh tih sawiin Minister chuan, "Zo nun ze mawi tlawmngaihna, inhmangaihna, induhsakna leh mi dang tana inpekna chi hrang hrang a rawn pâr vul thar leh hi a lawmawm. Hripui donaah pawh ṭan rualna hi kan chakna hnár a ni tih hriain, beidawng loin i ṭang sauh sauh ang u," a ti.

Health Minister sawi danin, hripui vei an pun zel avangin sorkarin enkawlna hmun tur a ruahman belh zel a; June 4, 2021 report angin Mizoramah Covid care centre 51 awmin, chutah chuan mi 2,612 an awm thei. Aizawl East leh West CMO huam chhúng bikah CCC 17 a awm a, mi 1,199 an awm thei. CCC dang pahnih, mi 200 awm theihna tur buatsaih zawh tawh a ni.

Mizoramah community covid care centre (CCCC) 168 awmin, mi 3,519 an awm thei. CCCC hi Aizawl East leh West CMO chhúng bikah 109 a awm a, eng emaw zat chu hman a la ni lo.

Health Minister chuan, hripui dona hmanrua, a bikin PPE, mask leh test kit hman tam loh theih loh a nih thu sawiin, "Ni tin PPE 400 chuang leh RAT kit 1,800 vel hmang ral ziah ang kan ni," a ti a; PPE kit leh test kit-te chu duh duh huna lei tur a awm loh ṭhin rualin, phâng loa awm theih nan theihtawp chhuah reng a nih thu a sawi.

Kum khat leh a chanve dáwn hripuiin nunphung a tihkhaihlak thu sawiin R Lalthangliana chuan, "Sorkar anga mawhphurhna ka chelhnaah, in mit tlun lohna tam tak ka neih ka ring. Kan hmalakna hrang hrangah duhthusam lohna leh tlin lohna te, beisei ka phak lohna thil tam tak ka nei ang, in ngaihdamna leh hriatthiamna ka ngen tak meuh meuh a ni," a ti.

Health Minister chuan, Covid-19 donaa hmalaknaah lawmthu sawiin, "Chief Minister, minister, MLA leh councillor zawng zawng te, kohhran, sorkar hnathawk, NGO, LTF leh VTF te, pawl hrang hrang leh mimalte'n hripui dona atan theihtawp kan chhuah a ni," a ti a; thawhhona a ṭhat avangin state dang nena khaikhinin Mizoram dinhmun a ziaawm phah niin a sawi.

Health Minister sawi ṭhenkhat
1) Lockdown pawtsei tura thutlukna siam hi thutlukna siam harsa tak a ni
2) Eizawnnaa thawk chhuaktu berte'n hri an kai a, a chhe ber kan tâwk a nih chuan a pawi thui zawk dawn
3) Hripui hian tu mah min thliar hrang lo, kan inenkawl sêng lo ang tih a hlauhawm
4) MKHC, MHIP, CYMA leh task force hruaitute'n rilṭáma thi an awm lohna turin theihtawp an chhuah, a ṭul anga luan chhuah zel an tum thu an sawi
5) Hripui donaah ṭan rualna hi kan chakna hnár a ni, beidawng loin i ṭang sauh sauh ang u
6) Ka hmalaknaah in duhthusam lohna leh tlin lohnaahte ngaihdamna ka dil