Covid-19 vei mi 55 thi tawh

June 6, Pathianni zan leh nimin khan Mizoramah Covid-19 vei mi pakhat ve ve an thi leh a; heti hian sorkar chhinchhiah angin hripui vanga thi mi 55 an awm tawh a, June thla bikah mi 15 an thi tawh.

Covid-19 vei enkawl lai Lalhmunliani (30) w/o Lalhmingmawia, Saron Veng, Aizawl chu Pathianni zan dar 8:10 khan enkawlna hmun State Referral Hospital-ah a thi a, nimin khan Saron Veng Recreation Centre-ah vui a ni.

Lalhmunliani hi Covid-19 positive a ni tih May 24, 2021-ah hmuh chhuah a ni a, Saron Veng CCCC-a enkawl a nih hnuah May 26 khan SRH-ZMC-ah dah luh a ni. Nau thla ruka upa pâi mek a ni a, Covid-19 a kâi hmain natna dang a neih sa hriat a ni lo.

Covid-19 vei SRH-ZMC-a enkawl lai dang PC Malsawmkima (42) h/o Hmingthantluangi, Sairang Dinthar chu nimin zing dar 4:45 khan a thi a, nimin chawhma dar 11 khan YMA Hall-ah vui a ni.

PC Malsawmkima hi Covid-19 positive a ni tih May 25, 2021-ah hmuh chhuah niin, hemi ní vêk hian SRH-ZMC-ah dah luh nghal a ni a, zunthlum nei sa a nih thu sorkar thuchhuakin a tarlang. Amah hi Covid-19 vanga June 4, 2021-a thi Lalremsiama nau (chhang chiah) a nih thu Sairang Dinthar Branch YMA hruaitute'n an sawi a; hripui vanga Mizorama unau thi hmasa ber an ni.