KHAWTHLIR

Thisen pe
Kolasib district-a infiamna pawl pathum - District Hockey Association, District Tennis Association leh District Karate Association-te chuan nimin khan Kolasib District Hospital-ah thisen an pe. Thisen petute mi pakua niin, District Sports Committee ruahman anga pe an ni a, a hmain association eng emaw zatin an lo pe tawh a ni.

PCV tlangzarh
Kolasib bawrhsap Dr H Lalthlangliana chuan nimin khan Kolasib Park-kâwn Primary Health Centre-ah nimin khan Pneumonia leh natna hrang hrang laka nausên vênna damdawi, Pneumococcal Conjugated Vaccine (PCV) a tlangzarh. PCV hi Kolasib district-a health worker-te'n nausénte hnenah an pe nghal a ni.

Rs. 7,55,930 hmu
May 30, 2021-a Ṭawngṭai Bethlel Camping Centre-a in pakhat kâng ṭanpuina atan Central YMA chuan Aizawla YMA branch 73 aṭangin Rs. 7,55,930 a dawng. CYMA chuan ṭanpuina sum thawhtu YMA branch-te hnenah lawmthu sawina lehkha a thawn chhuak a ni.

Lockdown thláwp
Peoples Conference party chuan thuchhuah siamin, hripui laka invên nan leh mipui him zawkna atana Mizoram sorkarin total lockdown a kalpui chhunzawm zel chu an thlàwp thu an tarlang. Sample test chak zawka kalpui tur te chhawmdawlna tam zawk pe chhuak tur leh, mipui mitmei vên nachang hria a, MNF party hamṭhatna tur ringawt engto lo tur te, eptu party-te thawhpui nachang hre turtein sorkar an chah bawk.

Containment zone
Lengpui rama Buichali bula BRTF camp chu containment zone-ah Aizawl DC-in a puang. Hemi hmuna awm harsatna neite tan incident commander Lalchhanhimi, phone no. 8575951959-ah biak pawh theih a ni.

Mi 17-in ventilator hmang
State Referral Hospital-ah nimin tlai dar 5 dinhmun angin Covid-19 vei mi 208 enkawl mek an ni a, mi 33 chu ICU-ah enkawl niin, an zinga 17 chu ventilator hmantir mek an ni. SRH-ZMC Bulletin tarlan danin, SRH-ZMC-ah hian nimin khan hripui vei mi 16 dah luh thar an ni a, mi pali an chhuak thung. Enkawl mek mi 208 zinga 175 chu ward hrang hrangah an awm a, an zinga mi 72 chu oxygen pek mek an ni.

Kângmei tuar ṭanpuina sem
Aizawl West-III bialtu MLA VL Zaithanzama chuan June 6, Pathianni khan MLA fund aṭangin a bial chhung, Maubawka kângmei tuar chhungkaw 17 hnenah Rs. 2,12,000 a sem a, Disaster Management & Rehabilitation aṭanga ṭanpuina sum hmuh Rs. 6,76,800 chu chhungkaw 21 hnenah a sem nghal bawk. Maubawk LC House-a kângmei tuarte ṭanpuina semnaah VL Zaithanzama chuan, Maubawka kângmei tuarte'n vanduaina nasa tak tawk mah se, hmangaihtu leh lainattu sorkar, pawl leh mimal tam tak an nei tih a sawi a; Covid-19 léng avangin chhawmdawlna hna duh angin a chak thei lo tih a sawi bawk.