Special economic package siam phût

Sumdawng pawl hrang hrang intélkhawm, Mizoram Bussiness Coordination Committee (MBCC) chuan, total lockdown kalpui zel a nih dawn chuan special economic package siamsak turin sorkar an ngen.

MBCC hruaitute chuan nimin khan chief minister Zoramthanga hmuh an tum a, mahse, CM thuràwn angin chief secretary Lalnunmawia Chuaungo an hmu zawk a ni.

Chief Secretary hnen­ah hian MBCC hruai­tute chuan, tawrh tlawk tlawk ringawt chu an hriatthiam loh thu thlenin, "Lockdown hi kalpui zel a nih dawn chuan sorkarin special economic package min siam rawh se," an ti.

MBCC chuan, sum­dawng hmun thuma ṭhena hmun khatin sumdawnna an kalpui theih loh thu an tarlang a, ni 50 dáwn dawr hawng thei lote bungrua a chhe nasa tawh tih sorkarin hria se an duh tih an sawi.

MBCC hian May 26, 2021 khan Chief Secretary hnenah, total lockdown avanga an harsatna tawh leh an duhte an thlen tawh a, chumi hnuah Chief Secretary hoa meeting-ah an duh dante an thlen leh bawk. Sumdawngte hian dawr inhawn chhâwk an duh a ni.