Covid-19 veite enkawl dan sawiho a ni : SRH-a dahte dinhmun a ṭha lo hman ṭhin
Nimin khan Health minister Dr R Lalthangliana hoin hriselna lama thawktute an ṭhukhawm a; State Referral Hospital (ZMC)-a doctor-te chuan, home isolation, covid care centre leh community covid care centre (CCCC) aṭanga hripui vei na zual deuh SRH-ZMC-a sawn luhte chu an dinhmun a ṭha lo hman viau zel tih an sawi.
Covid-19 veite enkawltu doctor-te chuan, home isolation, CCC leh CCCC aṭanga damlo SRH-ZMC-a sawn luhte chu an dinhmun a ṭha lo hman viau zel tih sawiin, "Henga awmte hian a zing thei anga pulse oxymeter hmangin oxygen level check ṭhin se a ṭha. Oxygen level (SPO2) 94% hnuai lam a nih chuan rang takin doctor-te hnenah inhriattir vat tur a ni," an ti.
Doctor-te chuan, damlo zingah thi an awmin an rilru a nat ṭhin thu leh hrehawm an tih ṭhin thu sawiin, "Theihtawp kan chhuah ve tak meuh a ni. Natna benvawn nei lo zingah pawh thi an awm tawh," an ti a; taksain natna hrik a do theihna (immunity) chak tâwk dan hriat theih a ni lo a, immunity nei ṭhaa hriatte pawh an thi tawh tih an sawi.
Ṭhutkhawmah hian home isolation/home quarantine, CCC leh CCCC-a awmte chu doctor-te'n tun aia uluk leh mumal zawka vil dan kawng ruahman ṭul an ti a; hripui veite chuap chu damlo dang aia a chhiat awlsam ṭhin avangin ventilator nazawngin a pui thei lo a, sorkarin ventilator ṭha chi 25 a chah thleng chu lawmawm an tih thu an tarlang.
Covid-19 positive-te enkawl dan chipchiar taka sawiho a ni a; damdawi a la awm loh avangin tuna inenkawl mek dan bakah, sorkar laipuiin nimin maia treatment protocol a tihchhuah chu zir chiang a, Mizoram dinhmun en chunga ruahmanna (treatment protocol) thar siam tur team an din a, Health Principal Director-in a kaihruai ang.
Tarlan a nih danin, Covid-19 thawh thumna thleng thei chu naupangin an tuar na dawna sawi a awm avangin SRH-ZMC-ah Neo-natal Intensive Care Unit (NICU) ruahman mek a ni a, chuta duty tur nurse-te chu Aizawl Civil Hospital NICU-ah training pek a ni dawn.
Chin hriat a nih loh avangin post covid care atan damdawi-in zawng zawng an inruahman a ṭul an ti a; SRH-ZMC-a Covid-19 vei enkawl dam tawh (negative), natna dang vanga inenkawl ngai leh oxygen mamawhte enkawlna tur hmun ruahman mek a ni.
Tui hù hîp (steam inhalation) chu Covid-19 laka invên nan a him lo tih India ram state ṭhenkhatah mithiamte'n an hmu chhuak tawh a; steam inhalation tih nasat lutukin hrawka natna hrik vaw chhuaktu a tihchhiat theih avangin fimkhur turin mipui an chah.
Nimin meeting-ah hian Covid-19 Medical Operational Team chairman Dr ZR Thiamsanga, MLA, Health secretary R Lalramnghaka, Health department hotu te, SRH-a hripui vei damlo enkawltu doctor te, Indian Medical Association, Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.