CMRF-ah cheng nuai 2,368.46 a lut tawh

Chief Minister’s Relief Fund (CMRF) for Covid-19 ah nimin thleng khan mimal leh páwl hrang hrangte'n Rs. 23,68,46,628 an chhûng lut tawh a, Covid-19 vanga harsatna tâwkte ṭanpuina atan leh, damdawi lam kaihhnawih thil leina leh buaipuina atan hman ṭhin a ni.

Sorkar thuchhuaha tarlan danin, CMRF hi a vawi khat nan April 3, 2020 khan Committee on Utilization of CMRF for Covid-19 chuan sem turin a rél a; April 8, 2020-ah Committee hmasa rorel chu ennawn lehin, chumi hnuah a taka sem chhuah a ni.

Committee on Utilization of CMRF for Covid-19 chuan kum 2021-ah CMRF sum chu vawi thum sem turin a rêl tawh a, chuta sum pek chhuah zat chu Rs. 2,75,32,470 a ni. Quarantine facility/centre, total lockdown vanga chhungkaw harsa leh Covid-19 leh a kaihhnawih thil dang buaipuina leh ṭanpuina atan hman a ni.

Chief Minister’s Office (CMO) chuan March 11, 2021 khan thuchhuah siamin, Mizoramah Covid-19 lengin ziaawm lam a pan zela hriat a nih avangin CMRF atana MLA pathumin MLA fund aṭanga Rs. 50,00,000 ṭheuh an thawh tawh chu a zatve, Rs. 25,00,000 ṭheuh pek kîr a nih thu leh MLA-te bial awmna DC-te hnenah pek lêt a nih thu a tarlang.

CMRF for Covid-19 ah hian nimin thleng khan Rs. 23,68,46,628 a lut tawh a, Rs. 23,42,56,970 hman tawh niin, hman loh Rs. 25,89,658 a la awm.