Jail aṭanga chhuak turte endik ṭhin

Jail chhunga Covid-19 inkài darh a nih loh nana hma latu tura din High Power Committee to Prevent the Spread of Covid-19 in Jails chuan, jail-a táng chhuah lailâwk turte chu Covid-19 vei a nih leh nih loh endik hmasak zel an nih thu a tarlang.

High Powered Committee chuan thuchhuah siamin, Committee chu Supreme Court thu anga din a nih thu a tarlang a, "Mizoram tana HPC chairman Justice Michael Zothankhuma hnuaiah March 2020-a din a nih aṭangin ṭum ruk meeting kan nei tawh a, meeting thutlukna angin jail táng lai ṭhenkhat chu bail-a chhuahtir lailâwk an ni," a ti.

Bail-a chhuahtirte chu an thubuai a fihlim tihna a ni lo tih sawiin Committee chuan, "Thubuai la nei rengin anmahni in leh lo aṭangin Court-in a koh apianga inlan tur an ni," a ti a; an chungthu rêl chhunzawm tur a nih bakah, chhuahtirte chu pawikhawihna tênau deuha inhnamhnawiha puhte a, thiam loh chantir an nih chuan jail-a lut leh mai tur an nih thu a tarlang.

Tun hnaia Central Jail-ah Covid-19 vei eng emaw zat hmuh chhuah a nih thu tarlangin Committee chuan, chuan, "Anni ho hi Jail complex chhunga CCC siam tharah dah vek an ni a, a ṭul dan azira hman theih turin CCC dang pawh siam belh mek a ni," a ti.

Committee thuchhuak ṭhenkhat
1. Tualthah, pawngsual, inrûnna leh hmeichhe naupangte chunga hurherhna lam hawi vanga mante bail-a chhuahtir an ni lo.
2. Ruihhlo tam tham man vanga thubuai neite bail-a chhuahtir zingah an tel lo.
3. Jail tángte Covid-19 hripuiin a luhchilh loh nan lut thar turte fel taka khung hran hmasak an ni.
4. Test an paltlang hnuah jail ward-ah an lut chauh ṭhin.
5. Committee rorelna avanga chhuahtir lailâwkte leh jail táng lai, an tàn hun tur hmang zoa chhuak turte chu Covid-19 negative an nih chauhin an chhuak thei.
6. Covid-19 positive-te chu CCC-ah dah zel an ni.