Sorkar hi hmasawnna hna thawhah ṭhu thluang mai tur a ni lo - MNF

MNF party chuan thuchhuah siamin, Covid-19 hripui léng mek mah se, sorkar chu hmasawnna hna thawh chungchangah ṭhu thluang mai tur a ni lo tih an tarlang.

Lockdown boruak kárah páwl leh mi ṭhenkhatte'n sorkarin ram hmasawnna tura hma a lâkna tihṭhuanawp tumin an sawisawp nia sawiin MNF chuan, "A beidawng zawnga mipuite zirtirna thu an thehdarh chiam chiam a. Sorkarin hripui dan chah tumin nasa taka inséngsoin a bei mek a, kan in lockdown mek a ni," an ti.

MNF chuan, SEDP board-te ṭhiat vek tur te, MSSSB ṭhiat tur te, raw chi supply tender titàwp tur te, hmanna tur bik nei leh thil danga pawhpèn theih loh sum che hlek ti lo tura inkhapbeh tumnate leh, sorkar che thei loa siam tum ang hrim leh tihmualpho tumna ang hrima thu thehdarh a tam ta hle tih an tarlang.

Ram roreltu sorkarin hripui do hneh dan tur a ngaihtuah tih sawiin, "A remchang thei apiangah ram development hna pawh a thawk tel zel tur a ni tih hi MNF ngaihdan a ni. Fûr ruah sûr laia thing tuah tur neih tlem avanga kaiṭèn leh sumhmunte ṭhiata thing tuah atana hman mai rawttu leh buh chi tuh tura loa feh loh mai rawttute ang mai kan lo ni thei tih i inhria ang u," an ti.

MNF party chuan, state dangte pawhin harsatna karah a theih ang angin an thawk nia sawiin, "Sorkar laipui pawhin a theih ang ang hmasawnna hna thawh zel tumin hma a la hram hram zel a ni," an ti a; ṭhenawm ramte mithmuhah beidawng hmel put a nih loh nan ngaihtuahna puitling tak nen inlungruala hma la turin mipui an sáwm a ni.