June 20-ah Championship khel dawn

Premier League hnuaia English football inelna sang Championship pawhin June 20-ah league khelh chhunzawm leh an tum thu an puang a, hetihrual hian EFL chuan 'ruahman chhinna' mai a la nih thu an sawi tel thung. 

March 8 hnuah khan Championship match khelh a ni leh tawh lo a, a hnu ni nganaah tiam chin awm loa tihtawp zui a ni. Mahse, tun hnaiah sorkar lam thlawpna nen infiamna hrang hrang neih ṭan an ni leh tawh a, Championship lam pawhin season khelh chhunzawm ve leh an tum ta a ni. 

Championship-ah hian match 108 zet khelh tur a la awm a, playoff semifinal leh final khelh a ngai dawn bawk. EFL lam chuan July 30 bawr velah playoff final khelh zawh hman an tum thu an sawi.

EFL chuan thuchhuah siamin sorkar lamin entu awm loa infiamna kalpui chhunzawm a phal tak avanga thutlukna siam an nih thu an sawi a, relegation leh promotion a awm avangin Premier League nen insu buai lo tura thutlukna chu uluk taka siam a nih thu an sawi bawk. 

Championship player-te hian May 25 aṭang khan training an lo nei daih tawh a, mahse he training-ah erawh dan pangngai anga training nei loin midang hlat thei ang berin training hi neih a ni. 

Premier League hnuaia inelna sang hian karleh lamah chuan training pangngai an nei leh tawh dawn. Hetihrual hian EFL chair Rick Parry chuan, "Engkim hi ruahman chhinna chauh a la ni tih hriat a pawimawh a, sorkarin min beisei anga kan himna tura dan zam zawng zawng kan zawm vek em, tihte chu kan en a la ngai dawn a ni," a ti. 

English second division league-ah hian test vawi thum kalpui a ni tawh a, test neih apiang hian mi 1,000 chuang zelin test hi an hmachhawn - Championship-ah hian club 24 an awm mek. 

Test neih hmasak berah hian Hull City aṭangin mi pahnih chu an positive, test vawi hnihnaah Fulham player pahnih an hming tarlan loh leh Blackburn captain Elliott Bennet-te chu an positive a, test hnuhnung berah mi 10 an positive tih puan niin Preston North End striker Jayden Stockley chu positive zingah a tel. 

Championship-ah hian match 37 khelh tawh aṭangin Leeds United chu a chung berah awmin an hnuai chiaha awm West Brom nena an inthlauhna chu point khat chauh a ni - league match kua ṭheuh khelh tur an la nei. 

Table-a a sang pahnih hi season thara Premier League khel tura tling chiang sa tur an ni a, pathumna aṭanga parukna - Fulham, Brentford, Nottingham Forest leh Preston North End-te chu playoff hmanga hmun ruak pakhat la awm inchuh thei dinhmunah an ding mek. League mawng lam luahtu team pathum chu League One lama relegate tur an ni bawk.