Covid-19 leng thawh hnihna chhungin Hripui vei mi 9,520 hmu chhuak tawh

Nimin khan Health minister Dr R Lalthang­liana hoin Secretariat conference hall-ah Covid-19 chungchang thlirho a ni a; kumin April aṭanga hripui léng thawh hnihnaah April 1 aṭanga June 7 thlengin Covid-19 positive mi 9,520 hmuh chhuah a nih tawh thu tarlan a ni.

Ṭhutkhawma IDSP report an tarlan danin, kumin April 1 aṭanga June 7 thlenga hripui vei 9,520 hmuh chhuah tawhte chu state páwn aṭanga lut mi 1,325 leh tualchhunga kái mi 8,195 an ni a; tualchhunga kai zinga mi 5,376 chu positive hmuh tawh nena inkungkaihna aṭanga kái niin, mi 2,819 chu kàina chin hriat loh an ni. Natna lang chhuak (symptom nei) 56% awmin, symptom nei lo 44% an awm.

Medical Operational Team on Covid-19 ten second wave chhunga Aizawla hripui vei tam zualna veng 14 an zir­chian­na report an tar­lang a; chu'ng veng 14-ah chuan swab sample 15,837 endik tawh aṭangin hripui vei mi 2,522 an awm a ni.

MOT on Covid-19 hotute chuan, hmai tuamna vuah leh hmang ṭha zingah hripui kai an awm lo tih an hmuchhuak niin an sawi a; SOP ṭha taka zawmna vengah hri an inkaidarh nasa lo a, hri vei zawng zawng aṭanga 85% chu chhungkua, ṭhian intlawh tawn, chhungkhat laina intlawhpawh leh ṭhenawmte nena intlawhpawh nasa an nih thu an sawi bawk.

Covid-19 léng thawh hnihnaa Aizawla hripui vei tam zualna vengte chu - Chhinga Veng, Saron Veng, Electric Veng, Bethlehem Vengthlang, Bawngkawn, Ramthar Veng, Bethlehem Veng, Dawrpui, Chanmari leh Tuithiang-te a ni.

Hripui vei mahni ina inenkawl, CCC leh CCCC-a awmte awmze nei zawka vil (monitor) dan tur sawiho a ni a, damlote leh doctor-te inbiakpawh zung zung theihna tur ruahman tum a ni. Doctor pension tawhte telna, hripui vei damlote enkawl dan turah rang taka ngaihtuah zung zung tur Scientific Study Team din a nih thu tarlan a ni bawk.

Chief Secretary chuan, kum 18-44 inkarte'n Covid-19 vaccine an lak kim theih nan theihtawp chhuaha ṭan an lak thu leh chu chu an ngaih pawimawh ber a nih thu a sawi. Ṭhutkhawmah hian Chief Secretary bakah, Health secretary R Lalramnghaka, Aizawl DC, DMR leh HFW department leh Police hotu te, Indian Medical Association, Non-Government Hospital Association of Mizoram leh MOT on Covid-19 aiawhte an tel a ni.