Hlawh thawh ve thei lo an awm : Beisei loh thawh an awm thung
Federation of Mizoram Government Employees & Workers (FMGEW) hnuaia pawl hrang hrangte chuan Covid-19 dona atan an ni khat hlawh an thawh khawm mek. Hlawh thawh remchang lo an awm nual laiin, thawh tura beisei zinga tel lo thawh an awm.
Vanglaini palai zawhna chhangin FMGEW hruaitute chuan, Covid-19 dona atana an thawh tur zat chiah hriat theih a la nih loh thu sawiin, "Hlawh lâk hun a inrual thei lo a, tunah hian group A leh B-te chuan hlawh an la la lo. Group C leh D lam pawh a thehluhna tur account-ah a la lut kim lo ang. Tun dinhmunah chuan eng zat chiah nge tlingkhawm dawn tih hriatthiam a la har rih," an ti.
FMGEW hruaitute chuan, hlawh thawh remchang lo an awm thu sawiin, "Kan thil tih hi intihluihna lam a ni lo a, a remchang lote chu kan hrethiam lutuk. A remchang lo tan chuan thawh loh theih tih sa a ni. Association ang tawpa hlawh thawh remchang lo erawh an awm loin kan hria," an ti a; hlawh thawh remchang lote chu drawing and disbursing officer (DDO) hnenah an inhriattir tih an sawi.
Hlawh thawh tura an beisei loh association leh mimal zingah hlawh thawh ve duh an awm tih sawiin FMGEW hruaitute chuan, "Kan ram dinhmun an thlir a, kan beisei loh zingah hlawh thawh ve ngei duh an awm hi kan lawm tak zet," an ti.
Chief Secretary nena an inkawmna bawhzuiin FMGEW chuan May 6, 2021 khan an hnuaia pawl hruaitute ko khawmin, Covid-19 dona atana hlawh thawh chungchang an rêl a; inhmuhkhawmnaah chuan ni khat hlawh thawh an remti a ni.
An thutlukna bawhzui hian hlawh thawh dan turah ruahmanna siam a ni a, ni khat hlawh chhût nan basic pay leh dearness allowance/ 30 hman a ni. DA nei lo sorkar hnathawkte chu thawhlawm thawh turin beisei an ni lo.
Sorkar department hrang hranga DDO-te chu an establishment ṭheuhah thawhlawm la khawm tura ngen an ni a; sorkar hnathawk zingah harsatna vanga pe thei lote chu an DDO hnenah ziaka thlen tura tih an ni.