ASF-in ziaawm lam a la pan lo : Hri vangin vawk 5,346 a thi tawh

March 21, 2021 aṭanga Lungsen, Lunglei district-a léng ṭan nia hriat African Swine Fever (ASF) chuan Mizoramah ziaawm lam a la pan lo. ASF vang hian Thawhṭanni thleng khan vawk 5,346 a thi tawh.

AH&Vety department hotute hnen aṭanga Vanglaini thu dawn danin, ASF léng hi a la ziaawm lo a, Mizorama district 11 zinga pakuaah a léng tawh. ASF veite chu hri an kài aṭanga rei lo têah an thi ṭhin. ASF vênna damdawi (vaccine) a awm lo a, enkawl dam theih a ni lo. Hri hi danchah a, nuaibo a nih thuai loh chuan Mizorama vawk zawng zawngin an thihpui theia ngaih a ni.

ASF hi vawkin vawk dangah awlsama takin a kâi chhâwng thei tih sawiin AH&Vety hotute chuan, "Boruaka léng (airborne) erawh a ni lo. Mihring thawmhnaw, kawr, kekawr, pheikhawk aṭangte pawhin awlsam takin vawkin an kái thei. Vawk enkawlnaa hman, hmanraw chi hrang hrang leh ran chaw aṭangte pawhin an kai thei," an ti a; vawk vulhtute chu hri lèn laiin intlawhpawh loh tur a nih thu an sawi.

AH&Vety department hotute chuan, ASF chu dan chaha nuaibo a nih thuai theih nan vawk thite awmna vawk-in ruak leh a velte uluk taka tihfai a, damdawi hmanga tihthianghlim tur a nih thu an sawi a, "Vawk thi pawh paih mai mai loin, uluk taka sâwngbâwl a, thûk taka phûm zel tur a ni," an ti.

Vawk vulhtu ṭhenkhatin an vawk hri kai tawh thi tho tur, an thih hun nghak mai loa suatsak (cull) turin depart­ment an ngen ṭhin tih sawiin AH&Vety hotute chuan,"Farm pahnih­ah hri kái tawh vawk 37 suat­pui a ni tawh. Vawk neitute’n thi tho tho tur ni tin pahnih khat lek leka phûm ai chuan, ṭum khata suat mai an duh vanga tih a ni," an ti a, intih­luihna a awm loh thu an sawi.