MSSSB Chairman-in pisa a luah ṭan Fair taka kal ka tum - Lalrammawia
Mizoram Subordinate Service Selection Board (MSSSB) chairman atana ruat Lalrammawia, MSS (Rtd.) chuan nimin khan pisa a luah ṭan a, fair taka kal a tum thu Vanglaini a hrilh. Hetih lai hian, Mizo Students' Union (MSU) chuan Lalrammawia chu pisa zawm lo turin an lo ngen tawh a ni.
MSSSB chairman atana Lalrammawia ruatna order chu February 24, 2020 khan DPAR-in a tichhuak a; Lalrammawia chu kum thum chhung emaw, kum 65 a tlin thleng emaw MSSSB chairman atan ruat a ni. Vanglaini palai zawhna chhangin Lalrammawia chuan, nimin (March 11) khan pisa a luah ṭan thu a sawi. Lalrammawia chuan, MNF adviser atana an ruatna chu MSSSB chairman atana ruat a ni dawn tih a hriat hmain a phat thu sawiin, "Party-a nihna pawimawh tak chelh chu ka tih ve chi a ni lo e, tiin MSSSB chairman atana ruat ka nih hma daihin bànna ka thehlut. Party adviser hna ka thawk hman lo," a ti.
Dik taka hna lâk kalpui a tum thu sawiin MSSSB Chairman chuan, "Sorkarin min dah ve tâkah chuan ka mawhphurhna hlen turin theihtawp ka chhuah ang, langtlang takin engkim kalpui ka tum," a ti a; dik lo taka thil a tih chuan a mualpho tur chu amah tho a nih avangin, dik loh chu thil tih chia a ngaih loh thu a sawi. MSU-te'n a pisa zawm lo tura an tih chungchangah Lalrammawia chuan, "Kei chu a hranpain engmah min hrilh lo. An tih âwmah chuan ka ngai ve tho. Mahse, sorkarin min ruat a, zawm leh lo tura min tih loh avangin ka zawm a ni," a ti.
February 24, 2020 vek hian DPAR chuan MSSSB member atana Ramhmangaiha Ralte ruatna order a tichhuak. Ramhmangaiha Ralte hi Higher & Technical Education joint director (admin.) a nih laia pension-a chhuak a ni.
Vanglaini palai zawhna chhangin Ramhmangaiha chuan, MSSSB atana thawktu tur hrang hrangte dahna order nimin (March 11) khan tihchhuah a nih thu sawiin, "Chairman-in a zawm velah MSSSB function tura tih a ni. MPSC-in group B (non-gazetted) hna lak tur an dawn department-ah an thawn kîr a, department lam hian kan hnenah an rawn la thehlut lo," a ti. Tarlan tawh angin, MSU General Headquarters hruaitute chuan March 5, 2020 khan Aizawl Press Club-ah thuthar thehdarhtute kâwmin, MSSSB chairman atana ruat Lalrammawia chu office zawm lo turin an ngen tih an puang.
MSU president Vanlalliana Khiangte chuan, MSSSB din a nih tâkah chuan Mizo ṭhalai hna zawng mek leh zirlaite hmakhua ngaia party induhsakna hleihluak a awm lohna turin Board enkawltu ruat kawngah sorkar chu fimkhur taka kal turin MSU-in an ngen tih a sawi a; chuti chunga political party adviser ṭhin chairman atana ruat a ni chu an hriatthiam loh thu a sawi a ni. Vanlalliana Khiangte chuan, Mizo ṭhalai leh zirlaite thlavâng hauhin a tàwp thlenga kal an tum thu sawiin, "MSSSB chairman atana ruat thar hi Mizo ṭhalai hna zawng mek leh zirlaite hlauhthawnna tireh turin a office zawm lo turin kan ngen. MSU-in zirlai leh ṭhalai hna zawng mekte aiawha a ngenna hian awmzia a neih theih nana kan hmalakna kawngah Mizo mipuite thlàwpna kan ngen nghal a ni," a ti. Tarlan tawh ṭhin angin, MSSSB hi MPSC-in hna a lâk ṭhin zinga group B (non gazetted) chin hnuai lam thawktu lak hna khawih turin Mizoram sorkarin a din thar a ni.