Sanitiser ṭha chauh la lut turin chah

Food and Drug Ad­mi­nistration (FDA) chuan nimin khan kut tihfaina (hand sanitiser) chungchangah mipui hriat tur an tichhuak a; Mizoram páwn aṭanga a hlawma hand sanitiser chah ṭhin­te chu manufacturer/distri­butor zîktluak hnen aṭang chauha la turin a chah.

FDA chuan, alcohol-based handrub chu World Health Organisation-in Covid-19 laka invênna atana a pawm a nih thu tarlangin, "Natna hrik chi hrang hrang a awm angin, chumi laka invênna atan hand sanitiser chi hrang hrang a awm hi thil dik lo a ni lo a, Covid-19 léng kara awm kan nih avangin sanitiser hman tur thlan hi a pawimawh lai a ni," an ti.

Alcohol-based hand sanitizer lei dawnah a label, alcohol awm zat, manu­facturing date leh expiry date-te chîk taka en a ṭul thu te, a siamtu zîktluak siam chhuahah spelling dik lo a awm ngai loh thute an tarlang bawk.