KHAWTHLIR
Thisen pe
Evangelical Church of Maraland KTP Trinity Branch, Siahatla chuan nimin khan Siaha District Hospital tan thisen unit ruk an pe a, petute mipa leh hmeichhia pathum ve ve an ni.
Containment zone
Rangvamual Mel-3 (Vanapa Section) chu Aizawl bawrhsap Dr Lalhriatzuali Ralte-in nimin khan Covid-19 containment zone-ah a puang. Hetih lai hian, Lunglei DC Kulothungan A chuan Tlabung khaw chhung veng hrang hrang containment area-a a puan tawh chu containment area a nihna a hlîp thung.
Mathematics zirna
Mizoram Secondary School Teachers Association (MISSTA) chuan pawl 9 zirlaite tana Mathematics zirtirna video clip tutorial an siam chu Youtube channel Zirna Huangah an dah a, clip 182 a awm.
Meizial man
Assam Rifles leh Champhai Customs Preventive Force chuan nimin khan Champhai Chhungte huam chhungah ram dang meizial bawmpui 23 an man a, a neitua puh mi pahnih an man bawk.
Paokai sûn
Zo Reunification Organisation (ZORO) chuan thuchhuah siamin, Manipur aṭanga Parliament member lo ni tawh Paokai Haokip a thi chu pawi an tih thu leh an sun thu an tarlang. ZORO tarlan danin, Paokai Haokip hi MP atan kum 1967-ah independent candidate ni chungin thlan tlin a ni a, kum 1972-ah Indian National Congress ticket-in thlan tlin leh a ni bawk.
BJP-in pe
BJP, Mizoram Pradesh chuan nimin khan Indian Medical Association (IMA), Mizoram Branch leh Upper Republic Local Council hnenah oxygen concentrator leh PPE kit an pe. BJP president Vanlalhmuaka chuan, Covid-19 avanga harsatna hrang hrangah sorkar laipui nawr a ngai emaw, IMA-te'n state sorkar kaltlang kher loa mamawh an neih a awm chuan theihtawp an chhuah tur thu a sawi.