Ráltlân Myanmar-a lêt leh turte June 10 hmaa lêt turin hriattir

YMA Sub-Head­quarters, Champhai chuan thuchhuah siam­in, Myanmar aṭanga Mizorama rawn raltlan an khaw lama lêt leh turte chu June 10, 2021 hmaa lêt turin an hriattir.

Champhai Sub-Hqrs YMA chuan, Myanmar aṭangin Mizoramah ráltlân eng emaw zat an lut tih tarlangin, "Ṭhenkhat chu thuneitute hriatpui lohin anmahni khaw lamah an lêt leh tih hriat a ni. Covid-19 léng mek avangin venhim hna thawh kawngah hetianga anmahni duh thu leh duh hun huna an chêt vel hi a rem loh avang leh, khaw hrang hrang tan a him loh theih avangin an haw theih dan tur ruahman a ni," an ti.

Myanmar ráltlân haw turte hriat tur
1) Raltlan, Champhai paltlanga Myanmar-a lêt leh duhte chuan an awmna LTF/VTF hnenah an hming, kum zat, Myanmar-a an awmna khua leh motor hman tur number chiang taka report-in, June 10, 2021 hmain an haw chho hman tur a ni. Hun tiam hnua haw turte'n harsatna an tâwk a nih pawhin anmahni mawh a ni ang.
2) Hripui léng avangin Myanmar-a haw tur, Champhai rawn paltlang tur reng rengin châwl khawmuang loin Myanmar an pan tur a ni. Champhai aṭanga Ṭiau kài thlenga motor an hman tur chu anmahni ngaihtuah tur a ni a, sum sên ṭul pawh anmahni intum tur a ni.
3) Raltlan haw tur reng reng chu Zokhawthar paltlanga lêt/haw phal a ni lo.
4) Champhai paltlanga Myanmar-a haw turte chuan zing dar 7 leh tlai dar 4 inkar chhungin Champhai (Khankawn police beat post) an thleng hman tur a ni. Police beat post-ah hian an inhriattir vek tur a ni a, chumi hnuah Champhai Sub-Hqrs YMA kaihhruainain escort tur an ni ang.