Ramri kaltlanga Covid-19 inkai darh Ven dan tur Champhaiah an sawiho

Champhai DC Maria CT Zuali hoin nimin khan DC conference hall-ah sorkar leh khawtlang hruaitute an ṭhukhawma, ramri kaltlanga Covid-19 inkai darh vên dan tur an sawiho.

Maria CT Zuali chuan, Covid-19 lêng laka himna tura sorkar aṭanga ramri venghim tura lehkha hmuh bawhzuina kal zelah meeting koh a nih thu a sawi a, "Myanmar nena ramri thui tak inṭâwm district kan nih avangin ramri vên uluk zual angai. Hripui léng vangin ramri kaltlanga inkalpawhna free movement regime tihtawp lailawk a ni a, kum hmasa lamah theihtawp chhuaha kan ṭanhona azarah hlawhtling takin ramri venhim a lo ni tawh a ni," a ti.

Meeting chuan, a theih chin chinah Indo-Myanmar ramri dep khuaahte Covid-19 duty post siam a, ngawrh taka duty an rél a, duty post tur an thlang nghal. VTF kaltlanga ramri veng tura inpete chu YMA hruaitute leh VC ruahmannain mumal taka ziah fel hnuah BDO hnenah volunteer list thehluh ni se, an ti.

Duty post awmna hmun/ram neitu VTF leh YMA branch-te'n an ram chhungah rammut hna thawk se, an tih bakah,m an theih chin bak chu a ṭul angin YMA Sub-Hqrs kuta thlen a, bawhzui ni se, an ti bawk. Senso ṭulte chu District Disaster Management Authority hnenah thehluh tur a ni.