Chief Secretary-in pawl hruaitute a kâwm

Chief secretary Lalnunmawia Chuaungo chuan, sorkarin inkhàrkhipna thupek a chhuah chungchangah June 7, Thawhṭanni khan Mizoram Kohhran Hruaitute Committee (MKHC), Joint NGO Coordination Committee, Mizoram Business Coordination Committee (MBCC) leh State Executive Committee-te a kâwm.

Lalnunmawia Chuaungo chuan, hripui laka mipui an him tlân theih nan inkhàrkhipna chu pawhsei a ngai rih tih a sawi a, "Hei hi ngaihdan leh duh dan hrang hrang zau taka la a, kil tin aṭanga an thlir hnuah loh theih lohna avanga tih a ni," a ti.

Chief Secretary chuan, "Inkhàrkhipin ei leh bâr zawn kawngah nasa takin mipui a nghawng mek a, hemi kaihhnawiha mipui leh MBCC harsatna tawhte chu sorkarin a hriatthiampui a ni," a ti a; MBCC-te harsatna tawh mek chu sutkian a nih theih nan hmalak a nih tur thu leh sorkar laipui leh RBI khawih thilte pawh nawrpui an nih tur thu a sawi.

Hripui dona kawnga sorkar, kohhran, tlawmngai pawlte leh mipui thawhhona ṭha tak chu chhunzawm zel turin Chief Secretary chuan a chah a; MKHC, Joint NGO, MBCC, task force leh mipui thlàwpnaah lawmthu a sawi bawk.