MLA-in bial mipuite buhfai khulsak dawn

MLA Zodintluanga Ralte chuan nimin khan a bial, Thorang huam chhunga Lungsen khua a tlawh a, khawtlang hruaitute nen harsatna leh mamawhte an sawiho. Covid-19 veite enkawlna siam dan tur a sawipui a, a bial pumah a theih chinah buhfai khulsak a tum thu a sawi.

Zodintluanga Ralte hian a biala damdawi-in pahnih - Lungsen PHC leh Bunghmun PHC tan oxygen concentrator a pe a, a thlàwna swab sample endik a nih theih nan RAT kit 1,000 ve ve a chahsak.

Lungsen BDO, doctor, Supply storekeeper-te leh village task force-te an inkâwm a, inbuatsaih lâwk nan CCC emaw, CCCC emaw siam dan tur an sawiho a; Lungsenah Covid-19 veite enkawlna tur siamah harsatna a awm dawn loh thu an sawi angin, a rang lamin centre siam an rél a ni.

Zodintluanga Ralte chuan, hripui léng kaihhnawihah mi tinte an inpe em em vek tih sawiin, "A thlamuanthlak a, harsatna kan neih chuan sawi hreh loh tur a ni," a ti a; tun dinhmunah harsatna hrang hrang a awm avangin buhfai pawh a bial pumah a theih chinah khulhsak a tum thu a sawi. Covid-19 vei an awm palha enkawlna hmuna inphurh dan turte a sawipui bawk.

Lungsena vawk tam tak a thi chu pawi a tih thu sawiin Zodintluanga chuan, "Hri a lèn tirh khan Vety Minister hnenah ka thlen nghal a, ani pawhin rang takin department-a thawktute nen an rawn tlawh nghal a, lawmawm ka ti hle a ni," a ti.