Thorang bial hmusitah bialtu MLA puh

MNF, Thorang Block I&II chuan thuchhuah siamin, an bialtu MLA Zodintluanga Ralte chu a bial chhung engah mah ngai loah leh hmusitah an puh.

June 3, 2021-ah Thorang bial chhung, Thénhlûm khuaa Covid-19 vei hmuh chhuah chu Bunghmun CCCC-a hruaina tur lirthei a awm loh avangin ama scooty-in a kal niin Thorang MNF chuan an tarlang a, "Bialtu MLA Zodintluanga'n MLA fund hmangin ambulance pahnih a lei a, pakhat chu Lunglei Civil Hospital-ah a pe tih hriat a ni," an ti a; pakhat zawk Rs. 19,20,949-a a lei chu a awmna hriat a ni lo tih an sawi.

Thorang MNF chuan, bialtu MLA-in a fund hmanga ambulance a lei, a awmna chin hriat loh chu ISUZU V-CROSS motor, private registration MZ01 T-8276 nia an hriat thu an tarlang a, "He motor Rs. 19,20,949 hian Thorang biala Bunghmun PHC leh Lungsen PHC-a hman tur ambulance pakhat ve ve leina a daih hle. Pu Zodintluanga hian MLA fund a hmanna aṭang hian Thorang bial hi engah mah a ngaih lohzia leh a hmuhsitzia a lang chiang a ni," an ti.

Bialtu MLA chu Bunghmun PHC leh Lungsen PHC tan ambulance leisak turin Thorang MNF chuan an phût bawk.