Mi hrang hrangin ṭanpuina an sem chhuak

Aizawl South-I bialtu MLA C Lalsawivunga leh AMC ward-XVI councillor R Lalawmpuii te chuan June 7, 2021 khan an bial chhungah chhawmdawl hna thawkin an che chhuak a; Bethlehem Veng leh Bethlehem Vengthlang leh College Veng LTF hnenah buhfai, alu, tél, tui, disinfectant, hand sanitiser eng emaw zat te an pe.

AMC ward-VIII councillor Christina Roluahpuii Sailo pawhin June 7 khan a bial chhunga middle school pathuma zirlai harsa zualte ṭanpuina atan zirlaibu leina turin sikul thuneitute hnenah ṭanpuina Rs. 3,000 ṭheuh a hlân.

Kolasib-a Women & Child Develop­ment hnuaia office hrang hrangte chuan nimin khan Jordan Centre CCC, Seṭhawnah nu leh naupang mamawh chi hrang hrang - chawṭha (nutrition), thawmhnaw leh inawm tleina bungrua (toys) eng emaw zat leh CCC-a thawkte tan Rs. 8,000 an pe a; Thingdawla Polytechnic QC-ah bungrua eng emaw zat an pe bawk.

Jordan Centre CCC leh Thingdawl Polytechnic-ah hian Kolasib khawpui veng hrang hranga mi inphal chhungkaw 15, MHIP Kolasib leh Runlum Nuthai Whatsapp group member-te pek khawm toys, lehkhabu, thawmhnaw leh damdawi chi hrang hrang an hlân nghal bawk a ni.