Sum enkawl leh inrelbawlnaah sorkar a hlawhchham

Mizoram Pradesh Youth Congress Committee (MPYCC) chuan MNF kaihhruai sorkar chu financial management leh ecomonic management-ah a hlawhchham let dêr niin an tarlang.

MPYCC thuchhuah chuan, "Sorkar hian lockdown avanga mi harsa leh tlachhe mekte chhanchhuahna scheme a kalpui vat loh chuan Aizawl khawpui lailia kut hnathawktu páwl beidawngin chemtum nena kawng an zawh ang kha a thleng leh mai ang tih kan hlauhpui a ni," a ti.

Mizoramah ni 50 chhung lockdown a ni tawh chungin hripui léngin kiam lam a pan thei lo tih sawiin MPYCC chuan, "Hei vang hian sorkar hian fimkhur tak chung sia kan ram economics dinhmun thlira kalphung a her rem hret hret a ngai tawh a ni," an ti a; India ram hmun dangah chuan inkhuahkhirhna khauh lutuk an thlah zalen hret hret thu an tarlang.

Congress ṭhalaite chuan, Mizoram chu lockdown puang hmasa ber a ni chunga hripui léng dinhmun a ziaawm thei lo chu sorkar hlawhchhamna nia an hriat thu an sawi a, "LTF/VTF, kohhran leh tlawmngai pawlin nasa taka sorkarin tih tur ni àwm takah hma an lâkpui mek laia vawiin thlenga hetiang dinhmuna kan la awm hi sorkar inpuahchah ṭhat loh vang leh ngaih pawimawh hmasak tur aia mau, PAHOSS, airport cute ber, phûl lem phah, duhsak zawngte tan contract hna a tuipui zawk vang a ni," an ti.

MPYCC chuan, lirtheia eizawng, ni tin inhlawhfate leh sumdawngte an mangang tawh hle tih sawiin, an manganna chuan sorkar au eih ngei se an duh thu an tarlang bawk.