Sum hmuh tura beisei zinga 72% vel hmuh a ni tawh

Financial year 2019-20 atana Mizoram sorkar budget tur Assembly House-in a pass tawh aṭangin Mizoram sorkarin cheng vbc. 7636.52 a hmu tawh. Sum hmuh tawh hi hmuh tur beisei zawng zawng aṭangin 72% vel a ni.

Mizoram Legislative Assembly budget session neih zawh tâka opposition group leader Lalduhoma zawhna chief minister Zoramthanga, Finance changtuin a chhàn danin, kum 2019-20 budget-a Mizoram sorkarin sum a hmuh tawh cheng vbc. 7636.32 zinga a tam ber, cheng vbc. 6372.43 chu Revenue receipt a ni a; Capital receipt aṭangin cheng vbc. 740.37 leh Public account aṭangin cheng vbc. 523.52 hmuh a ni tawh.

Revenue receipt aṭanga hmuh tawh zat cheng vbc. 6372.43 hi Revenue receipt aṭanga hmuh tura beisei zawng zawng aṭangin 64.71% a ni a; Capital receipt aṭanga hmuh tawh vbc. 740.37 chu hmuh tura beisei aṭangin 95.90% niin, Public account aṭanga hmuh tawh cheng vbc. 523.52 chu hmuh tura beisei aṭangin 55.78% a ni.