Ruling leh opposition VC chan tur a inang - Lalduhoma
MLA Lalduhoma chuan, tunlaiah ruling sorkar kalphung a inthlak tawh tih sawiin, "Khaw tin chan tur budget siam sa vek a ni tawh. Ruling V/C neih kher a ṭul tawh lo, ruling leh opposition VC-te chan tur a inang reng tawh a ni," a ti.
March 10, Thawhlehni zana Sesawng BNRGSK Hall kawta ZPM-in vantlang inkhawm a buatsaihah thu sawiin Lalduhoma chuan, "ZPM a sorkar hunah chuan rate hre sain thlai in chíng ang a, chìn sual leh hralh theih loh a awm ve lo ang," a ti a; ṭhalai, mahni kutkea din duh, thiamna nei, bul ṭanna tur nei lote bul ṭanna tur sorkarin a siamsak dawn thu a sawi.
Lalduhoma chuan, ZPM chu Brig. T Sailo hmathlir, a tihhlawhtlin hman tâk lohte tihlawhtling tura ding a nih thu sawiin, Mizorama sorkar ding tawhte hnuaiah hydel project hlamzuih pariat leh thermal project hlamzuih pakhat a awm thu a sawi a, "Kan sorkar kal ta khan hydel project pakua siam tumin agreement an sign a, pakhat mah hlawhtling a awm lo. Chhungkaw tinin basic need kan neih a ngai a, basic need nei turin mahnia dinchhuah tum, tih ngaihna hrelo tan bána kaih (hand holding) policy kan nei a, ZPM chuan a sorkar hunah mipui dâwm kân a tum a ni," a ti.
MLA dang Vanlalhlana chuan, "Ram leh hnam tana hnam sipaia inpe, zalenna suala rammu lo let lehte tun thlengin in leh lo la nei lo leh ni tin eichawpa buai an awm nual a, an pute'n an ngaihsak lo niin a hriat a, an khawngaihthlak hle. Remna leh muanna kan neih hnua Mizoram mamawh ber chu ei leh bara hnianghnar a ni a, thla thum eikhawp chauh kan la thar bawk si a, a manganthlak hle a ni," a ti a; kum 2018 inthlan hmaa MNF-in an sorkar hunah cheng nuai thum sem an intiam tawh chu budget session-ah an sem loh tur thu an sawi leh si tih a sawi.
Dr Vanlalthlana, MLA pawhin thu sawiin, Mizote'n politics an hriat dan chu inbum leh eirûk a ni ber ṭhin a, chumi siamṭha tur chuan ṭhalaite'n ke an pên chhuah a ṭul thu a sawi a, "Ruahmanna felfai awm si loin, a hralhna tur awm lo an duh duh thlai min chìntir a, mipui beidawnna leh rilru natna min siamsak hnem tawh," a ti. India ram state zingah Mizoram chu sorkar laipuia innghat nasa ber a nih thu sawiin Dr Vanlalthlana chuan, "Sorkar kan hrawn tawhte'n intodelhna lama min hruai loin, central aṭanga pawisa sawi chhuak tam thei intihtheihnaa an ngaih vang a ni," a ti. CM Zoramthanga chu Mizo hnam zalenna atana nunna thàpa rammú a nih avangin fakawm a tih thu a sawi rualin, "Ram a hruainaah thu belhchian dâwl lo mipui min hrilh nasa lutuk," a ti a; mipuite'n Mizoram dinhmun dik tak an hriat hunah hruaitu an thlan thiam tawh ngei a beisei thu a sawi.