Kut hnathawktute tan hmun 240-ah Tui verh chhuah kalpui mek a ni

Irrigation & Water Resources department (IWR) chuan tunlai hian leilet leh huan neite tan Mizoram hmun 240-ah tui verh hna ‘Ground water irrigation project’ an kalpui mek. Project hi PMKSY leh NABARD aṭanga kal a ni a, huan/leilet neitu chhungkaw 502 a châwm thei dawn a ni.

Vanglaini palaiin a kawmnaah IWRD hotute chuan, Ministry of Jal Shakti hnuaia Department of Water Resources RDGR chuan Pradhan Mantri Krishi Sanchau Yojona (PMKSY) project HKKP (ground water) kalpui turin kum 2020-21 atan cheng nuai 1,604.89 a rawn phalsak. Project 13 inkawp niin, district hrang hranga huan/leilet siamtute tan hmun 209-ah tui verh tur a ni a, Dárlâk zau hmun 13-ah chhungkaw 468 châwm tur verh zawh a ni tawh.

Project atan hian cheng nuai 1,604.89 aṭangin Mizoram sorkar chuan nuai 886 a dawng tawh a, state tum ve tur cheng nuai 159 pawh tihfel a ni tawh. Mizorama a vawi khatna a ni a, IWR department-in a verh hna leh ṭul zawng zawng an tih zawhah lo/huan neitute'n an enkawl zui dawn a ni.

Ni zung chakna (solar energy) hmanga power siamna tur cheng nuai 7 vel leh electric hmang turin cheng nuai 6 chuang sen tur a awm bawk a; solar hmang chi 184 leh electric hmang chi 25 hman a ni ang.

IWR department hotute chuan, "A tirah verh fuh tâwk loh kan nei a, tunah chuan kan thiam tawh. Tih fuh loh pawhin sên ṭeuh ṭeuh tho a ngai," an ti a; lockdown avangin khaw ṭhenkhatah an lut thei lo a, hna thawh chak a har tih an sawi.

NABARD hnuaiah Serchhip ram Mat phaia tui harsatna hmun Chawmzaua huan neitute tan pawh hmun 31-ah verh tur a ni a, chhungkaw 34 hman tur a ni. Lei verhna atan sorkar laipuiin cheng nuai 227.15 a pawm a, chuta ṭang chuan cheng nuai 124.9 hmuh a ni tawh.

Chawmzauah hian hmun paruk verh a ni tawh a, a vaia verh zawh hunah solar hmang chi 21 leh electric hmang chi hmun 10-ah a awm dawn a ni.

IWR department hotute chuan, Prime Minister KUSUM project hnuaiah huan/leilet neitute tan subsidy-a solar pump pek theihna tur pawh an buaipui mek tih an sawi.