KHAWTHLIR
Thisen pe
Kolasib District Wrestling Association chuan District Sports Committee ruahman angin June 8, Thawhlehni khan Kolasib District Hospital-ah thisen unit sarih an pe a, petute mipa pali leh hmeichhia pathum an ni.
Chhiatna hmachhawn dan tur sawiho
Lawngtlai additional DC Marilyn Rualzakhumthangi hoin nimin khan chhiatrupna thlen thulha hma latu tur khawpui chhunga bialtu zonal officer-te Lawngtlaiah an ṭhukhawm. Quick Response Team (QRT) ṭangkai zawka hman dan tur te, zone ṭhen dan leh bialtu zonal officer-te chungchanga siam rem ngaite sawiho a ni.
CM Relief Fund
Chief Minister's Relief Fund for Covid-19 ah nimin khan mimal leh páwl hrang hrangin Rs. 5,56,112 an chhûng lût. CMRF for Covid-19 ah hian nimin thleng khan Rs. 23,76,22,740 a lut tawh a, Rs. 23,42,56,970 hman tawh niin, hman loh Rs. 33,65,770 a la awm.
Lunglei tanpui
New Delhi-a ACT Grants & Swasth Alliance leh O2 for India-te chuan Lunglei district tan damdawi bungrua chi hrang hrang an pe a, nimin khan bawrhsap Kulothungan A-in Lungleia Health deparment hotute hnenah a hlàn. ACT Grants & Swasth Alliance hian oxygen concentrator 40 leh BiPAP ventilator paruk an pe a, O2 for India-in oxygen concentrator panga an pe thung a; a phurhna senso nen Rs. 56,00,000 hu a ni.
Eptute thawhpui turin sorkar phût
PC party chuan, MNF kaihhruai sorkar chu party rilru dahṭha a, lungrual taka hripui do a nih theih nan eptu party-te ṭha taka thawhpui turin an phût. PC party chuan, "Heti khawpa Covid-19 hripuiin min nuai tawh laia a do lêtna tur thlirhona neih reng rengah sorkarin political party-te a telh ve ngai miah lo hian MNF sorkarin hripui dona kawngah mipute hmakhua aia MNF party hamṭhatna tur ringawt a engto zawkzia a tilang chiang hleah kan ngai," an ti.
Containment zone ṭhenkhat hlîp
Aizawla Covid-19 hri inkai darh tam zualna veng 10-a containment zone-a puan tawh ṭhenkhat chu hlih a nih thu Aizawl district bawrhsap chuan a puang. Containment zone hlihte chu - Armed Veng, Bethlehem Veng, Bethlehem Vengthlang, Chhinga Veng, Chanmari, Durtlang Leitan, Armed Veng South, Ramthar Veng, Khatla leh Tuivamit vengte a ni. Armed Veng, Chhinga Veng, Tuivamit leh Khatla venga hmun ṭhenkhat chu containment zone-ah puan zui zel a ni bawk.